“ძალიან დიდი პოლიტიკური ბატალიები მოყვა ამას და თითზე დაიხვია ოპოზიციამ და გარკვეულმა ვაი ექსპერტებმა” – ამის შესახებ სემეკ-ის თავმჯდომარემ, დავით ნარმანიამ TV იმედის ეთერში, გადაცემა ბიზნესინსაიდერში თქვა, გაზის ტარიფის დადგენის წესის ცვლილებაზე საუბრისას.
ნარმანია აღნიშნავს, რომ მარეგულირებელ კომისიას მიენიჭა უფლებამოსილება, “საჭიროების შემთხვევაში”, დაადგინოს მოხმარების მიხედვით სხვადასხვა მოცულობის ტარიფი.
“ჩვენ ეს უფლებამოსილება გვაქვს ელექტრომომარაგების სექტორში, წყალმომარაგების სექტორში, როცა მოხმარების მიხედვით ვადგენთ. პირობითად, ას კილოვატამდე ვინც მოიხმარს ელექტროენერგიას, იმისთვის უფრო დაბალი ტარიფია, ასიდან სამასამდე სხვა ტარიფია, სამასზე მეტზე – სხვა.
ასევე, ძაბვის საფეხურების მიხედვით კომერციული სექტორისთვის სხვა ტარიფებს ვადგენთ და ასეთი უფლებამოსილება ენიჭება მარეგულირებელ კომისიას, რომ საჭიროების შემთხვევაში, დაადგინოს ბუნებრივ აირზეც საფეხურებრივი ტარიფი.
შეიძლება, ვიფიქროთ იმაზე, რომ მომხმარებლები, რომლებიც მცირეს მოიხმარენ, ესენი არიან რეგიონებში მაცხოვრებლები, ეს არის სხვადასხვა კატეგორიის შეჭირვებული მოსახლეობა და ა.შ, რომელსაც მცირე მოხმარება აქვს, მისთვის რომ ფინანსური ტვირთი იყოს დაბალი, ხოლო მაღალი მოხმარების საოჯახო მეურნეობებს, რომლებიც არიან ძირითადად უფრო შეძლებული ოჯახები, რომელთაც აქვთ იგივე საცურაო აუზები და ათბობენ ამ საცურაო აუზებს ბუნებრივი აირით, მათთვის დადგინდეს ცოტათი უფრო სხვანაირი ან უფრო მაღალი ტარიფი” – ამბობს ნარმანია.
სემეკ-ის თავმჯდომარის თქმითვე, “ასეთი გამოცდილება არის სხვადასხვა ქვეყნებში და ჩვენც გვექნება ამის უფლებამოსილება, საჭიროების შემთხვევაში დავადგინოთ ასეთი დიფერენცირებული ტარიფები”.
28 ოქტომბერს ივანიშვილის პარლამენტმა შეცვალა ბუნებრივი გაზის მომხმარებლებისთვის ტარიფის დადგენის წესი. კერძოდ, 2038 წლის 1 იანვრამდე სემეკ-ი და მარეგულირებელი კომისია ტარიფს დაადგენს მოხმარებული მოცულობის გათვალისწინებით, რაც ნიშნავს იმას, რომ ვინც მეტს მოიხმარს, მეტს იხდის.
“კომისიას ენიჭება უფლებამოსილება გარდამავალ პერიოდში წყალმომარაგებისა და ბუნებრივი გაზის საყოფაცხოვრებო მომხმარებლებისთვის დაადგინოს განსხვავებული ტარიფები მოხმარებული მოცულობების მიხედვით. ამასთან, დღეის მდგომარეობით საყოფაცხოვრებო მომხმარებლებისათვის დგინდება ბუნებრივი გაზის მოხმარების ტარიფები განაწილების ლიცენზიატების ოპერირების არეალების მიხედვით და თითოეული მოხმარებული კუბური მეტრი ბუნებრივი გაზის მოხმარების ტარიფი არ იცვლება მოხმარებული ბუნებრივი გაზის რაოდენობის მიხედვით.” – ნათქვამია განმარტებით ბარათში.
გარდა ამისა, მოქმედი რეგულაციით, წყალმომარაგების ტარიფის დადგენისას კომისია უფლებამოსილია 2027 წლის 1 იანვრამდე წყალმომარაგების მომსახურების ღირებულება სხვადასხვა კატეგორიის მომხმარებელზე განსახვავებული პროპორციით გადაანაწილოს. ახალი ცვლილების მიხედვით კი, კომისიას ამის უფლება 2036 წლის 1 იანვრამდე ექნება.
ივანიშვილის წარმომადგენელმა, შოთა ბერეკაშვილმა ეკონომიკური პოლიტიკის სხდომაზე განაცხადა, რომ ეს ახალ კულტურას დანერგავს საზოგადოებაში ენერგიის დაზოგვის მიმართულებით.
“ლოგიკა არის ის, რომ დავნერგოთ დაზოგვის პოლიტიკა. ყველა განვითარებულ ქვეყანაში აქცენტი ენიჭება ენერგორესურსების დაზოგვას. აშშ-სა და ევროკავშირის თითქმის ყველა ქვეყანაში მოქალაქეებს ბავშვობიდან უნერგავენ, რომ ენერგორესურსები ლიმიტირებულია და მაქსიმალურად უნდა დაიზოგოს. თუკი ჩვენ პოლიტიკა გვექნება, რომ ის ვინც ზოგავს და ეკონომიურად მოიხმარს, ნაკლებს გადაიხდის, ეს პოლიტიკა ძალიან ჯანსაღია და პირადად მე მიმაჩნია, რომ ახალ კულტურას დანერგავს საზოგადოებაში ენერგიის დაზოგვის მიმართულებით.
დიფერენცირებული ტარიფი, ბუნებრივად, ნიშნავს იმას, რომ ვინც ნაკლებს მოიხმარს, მისთვის ტარიფი ნაკლები იქნება, ხოლო ვინც მეტს მოიხმარს – მისთვის უფრო მაღალი იქნება.” – თქვა ბერეკაშვილმა.