ირაკლი კობახიძის ბრიუსელურ ვიზიტს და „ევრონიუსის“ ფორუმზე გაკეთებულ განცხადებებს მწვავე შეფასებები მოჰყვა. ექსპერტები და სამოქალაქო სექტორის წარმომადგენლები აცხადებენ, რომ კობახიძემ ვერ შეძლო ევროკავშირის მიმართ „ქართული ოცნების“ პოზიციის დასაბუთება და საერთაშორისო აუდიტორიას კიდევ ერთხელ დაანახა ხელისუფლების ანტიდასავლური პოლიტიკა. მათი შეფასებით, ბრიუსელში გამართული ინტერვიუ მმართველი პარტიის მორიგი პოლიტიკური ფიასკო იყო
ყველამ დაინახა თუ რამდენად უსუსურია და რამდენად არარსებულია მათი არგუმენტაცია ევროკავშირთან მიმართებით, თუ რამდენად იტყუებიან, როდესაც ამბობენ, თითქოს ევროკავშირია მათთან დამნაშავე. ისინი კიდევ ერთხელ გამოჩნდნენ როგორც სრულიად უარგუმენტო, სრულიად სუსტი პოზიციის მქონე პარტია. მას ჰქონდა შესაძლებლობა, რომ რაღაც ფორმით მაინც მდგომარეობა ოდნავ გამოეყვანა, მაგრამ ამის საპირისპიროდ გააკეთა ყველაფერი იმის საჩვენებლად, რომ რეალურად, “ქართული ოცნება” წარმოადგენს ანტიევროპულ, ანტიდასავლურ პოლიტიკურ ძალას, რომელიც ეწინააღმდეგება საქართველოში დემოკრატიის, ადამიანის უფლებებისა და სამართლის უზენაესობის დამკვიდრებას, – ამბობს დიპლომატი გიგი გიგიაძე.
“საერთაშორისო გამჭვირვალობა – საქართველოს” იურისტი, სანდრო ბარამიძე კი მიიჩნევს, რომ კობახიძის ბრიუსელური გამოსვლა ევროპული აუდიტორიის დარწმუნებას არ ემსახურებოდა. მისი შეფასებით, ვიზიტის მთავარი მიზანი შიდა პოლიტიკური მხარდამჭერებისთვის ხელისუფლების გზავნილების გამეორება იყო.
კობახიძე ჩავიდა ბრიუსელში იმისთვის, რომ მოეყოლა იგივე ტყუილები, რასაც იგი და მისი პროპაგანდისტული არხები ყოველდღიურად აცხადებენ საქართველოში და რითაც ატყუებენ ქართულ მოსახლეობას, რომლის დიდი უმრავლესობაც, ცხადია, არ ტყუვდება. მითუმეტეს, არ მოტყუვდა ბრიუსელი. ეს ყველაფერი, რასაკვირველია, არის, უბრალოდ, პროპაგანდისტული ილეთი გათვლილი არა იმდენად ევროპული საზოგადოებისთვის, რამდენადაც ისევ და ისევ ადგილობრივი ქოცებისთვის, რომლებისთვისაც ყველაფერი, რასაც კობახიძე იტყვის, აღმაფრთოვანებელია. ეს არის აბსოლუტურად იზოლაციაში მყოფი მატყუარა რეჟიმი, რომელიც თავის სასტიკ მეთოდებს ასაღებს როგორც საუკეთესო დემოკრატიას, – ამბობს სანდრო ბარამიძე.
„ევროპულ-ქართული ინსტიტუტის“ დამფუძნებელი გიორგი მელაშვილი კობახიძის გამოსვლას პოლიტიკურ ფიასკოს უწოდებს. მისი განცხადებით, ინტერვიუმ ნათლად აჩვენა, რამდენად აცდენილია „ქართული ოცნების“ საგარეო პოლიტიკა ევროპულ რეალობას.
“ქართული ოცნების” საგარეო პოლიტიკა იმდენად არაადეკვატურია, რომ მისი დაცვა ფიზიკურად შეუძლებელი ხდება. ირაკლი კობახიძემ ინტერვიუმ ძალიან ნათლად აჩვენა უკვე ევროპულ საზოაგდოებას თუ რამდენად არაადეკვატური და აცდენილი რეალობას არის “ქართული ოცნება” და შესაბამისად, იმ ფიასკოების სიას, რომელიც იყო ირაკლი ღარიბაშვილი გლობზეკის ფორუმზე, ახლა დაემატა ირაკლი კობახიძე ბრიუსელში, – ამბობს “ევროპულ-ქართული ინსტიტუტის” დამფუძნებელი გიორგი მელაშვილი.
შეგახსენებთ, რომ ირაკლი კობახიძე გუშინ ბრიუსელში “ევრონიუსის” ფორუმზე იმყოფებოდა, სადაც მედიის კითხვებს უპასუხა.