ბათუმში შინაური და მიუსაფარი ცხოველების მოვლა-პატრონობისა და საზოგადოებრივ სივრცეებში მათი გადაადგილების წესები გამკაცრდა.
საკანონმდებლო ცვლილებების ნაწილი წლის დასაწყისში ამოქმედდა, დამატებითი რეგულაციები კი ბათუმის საკრებულომ 30 ოქტომბერს დააზუსტა.
ცვლილებების მიხედვით, საზოგადოებრივი თავშეყრის ადგილებში ძაღლის საბელის ან ალიკაპის გარეშე გასეირნება 150 ლარით დაჯარიმებას გამოიწვევს.
მომეტებული რისკის ჯგუფში შემავალი ძაღლების შემთხვევაში სავალდებულოა ორივე საშუალების გამოყენება. ცხოველის მიერ საზოგადოებრივი სივრცის დაბინძურების შემთხვევაში კი მეპატრონე ვალდებულია ტერიტორია დაასუფთაოს.
ახალი წესებით, მეპატრონეს საკუთრებაში ერთდროულად ხუთზე მეტი ცხოველის ყოლა ეკრძალება. შეზღუდვა არ ვრცელდება ექვს თვემდე ასაკის ნაშიერებზე.
ასევე აკრძალულია არასამკურნალო მიზნით ცხოველისთვის ყურებისა და კუდის მოჭრა, ეშვებისა და ბრჭყალების ამოღება, სმენის დაქვეითება და ხმის იოგების გადაჭრა.
რეგულაციები ითვალისწინებს საზოგადოებრივ ტრანსპორტში ცხოველების სპეციალური დაცვის საშუალებების გარეშე გადაადგილებისა და მათი საგანმანათლებლო დაწესებულებებსა და საავადმყოფოებში შეყვანის აკრძალვასაც.
კანონმდებლობის მიხედვით, ცხოველის მეპატრონე შეიძლება გახდეს 16 წელს მიღწეული პირი, რომელსაც ნასამართლობა არ აქვს. მეპატრონე ვალდებულია უზრუნველყოს
ცხოველის რეგისტრაცია, ვეტერინარული შემოწმება, ანტირაბიული ვაქცინაცია, სტერილიზაცია ან კასტრაცია და უსაფრთხოების წესების დაცვით გასეირნება.
ცვლილებები ეხება მიუსაფარი ცხოველების მიკედლებასაც. ნებისმიერ პირს შეუძლია უპატრონო ცხოველის მიკედლება შესაბამისი რეგისტრაციის საფუძველზე, თუმცა ამისთვის
აუცილებელია ცხოველის წინასწარი სტერილიზაცია ან კასტრაცია. მიკედლების შემთხვევაში პირმა უნდა უზრუნველყოს ცხოველის გამოკვება და საჭირო სამედიცინო მომსახურება.
ამასთან, მკაცრდება ცხოველების მიტოვებაზე კონტროლიც.
ბათუმის მუნიციპალური ინსპექციის ინფორმაციით, დღეს ბულვარის ტერიტორიაზე ცხოველების მეპატრონეებს ახალი რეგულაციები კიდევ ერთხელ გააცნეს. პარალელურად,
მიუსაფარი ცხოველების მოვლა-პატრონობისთვის საჭირო ღონისძიებებიც გაატარეს.