გადასასვლელ ხიდზე გაჩენილი ხანძრის მიზეზი ამ დრომდე უცნობია. ადგილზე საგამოძიებო მოქმედებები დასრულებულია, თუმცა ჯერჯერობით არ არსებობს პასუხი, რამ გამოიწვია ცეცხლის გაჩენა და ხომ არ ჰქონდა ადგილი განზრახ ქმედებას. ხანძრის შედეგად დაიწვა ათეულობით მაღაზია და განადგურდა ათასობით ლარის ღირებულების საქონელი.
დილიდან ტერიტორიაზე იმყოფებიან დაზარალებული მოვაჭრეები, თუმცა უსაფრთხოების ზომებიდან გამომდინარე, მათ დამწვარ სავაჭრო ობიექტებთან მისვლის უფლება არ ეძლევათ. მოვაჭრეები ხანძრის გამომწვევი მიზეზების დადგენასა და ზარალის ანაზღაურების საკითხზე პასუხს ითხოვენ. მათი თქმით, ხანძრამდე ცოტა ხნით ადრე იყო საუბარი, რომ ადგილზე მაღაზიების სრულად აღებასა და საავტომობილო გზის გაკეთება იგეგმებოდა.
შვილებს გეფიცები, ერთი ნაჭერი არ წამომიღია. ტომარანახევარი ფარდა დამრჩა გაუხსნელი და კიდევ რამდენიმე რამე… ჩანთაში 200 ლარი მქონდა, ისიც იქ დარჩა… არავინ მოსულა ჯერ, – ამბობს ერთ-ერთი მოვაჭრე.
კაციშვილი არ არის ჩვენი პატრონი, აგვყრიან-დაგვყრიან… 22 ჯიხურია დამწვარი. დეკემბრამდე გვქონდა ჩვენ დრო და დეკემბრამდე რა დროა და აი, ეს გააკეთეს, რავიცი… დეკემბრამდე უნდა ვყოფილიყავით, მერე “ინგრევაო და რაღაცეები უნდა აშენდესო”…, – ამბობს კიდევ ერთი მოვაჭრე.
4 მაღაზია მქონდა, ორი დამწვარია, ორი კიდევ წყალში ცურავს. ვინ გადაგვიხდის, რას გადაგვიხდის, როგორ იქნება ჩვენი საქმე, არაფერი ვიცი. ჩვენთან არავინ მოსულა, არავინ დაგვლაპარაკებია. ამის გათავისუფლებას კი ამბობდნენ, მაგრამ ეთქვათ და ისე წავიდოდით, რა საჭირო იყო დაწვა… რაღაც პროექტი არსებობდა, იქ ბანერი იყო გამოკრული და ვიცოდით, რომ ეს მოხდებოდა, მაგრამ როდის მოხდებოდა, ეს არ ვიცოდით, – ამბობს კიდევ ერთი მოვაჭრე.