ციხეებში პატიმრების რაოდენობის ზრდის ტენდენცია გრძელდება.
საქსტატის უახლესი, 30 სექტემბრის ანგარიშის მიხედვით, 14 პენიტენციურ დაწესებულებაში ჯამში 12 375 პატიმარია – როგორც მსჯავრდებული, ისე ბრალდებული.
მიუხედავად იმისა, რომ სექტემბრის განმავლობაში ციხე, სხვადასხვა საფუძვლით, 756 პირმა დატოვა, პატიმრების საერთო რაოდენობა მაინც გაიზარდა 63 ადამიანით (31 აგვისტოს მონაცემებით ციხეებში, ჯამში 12 312 პატიმარი იყო).
გაზრდილია არასრულწლოვანი პატიმრების რაოდენობაც: თუ აგვისტოს ბოლოს ციხეში 183 არასრულწლოვანი იჯდა, სექტემბრის ბოლოს მათი რაოდენობა 191 იყო.
საინტერესოა, რომ პატიმრების საერთო რაოდენობა გაიზარდა ბრალდებულთა ხარჯზე: თუ 31 აგვისტოს მონაცემებით ციხეებში 2 681 ბრალდებული იყო, 30 სექტემბერს მათი რიცხვი 2 765-მდე გაიზარდა, რაც წინა თვესთან შედარებით 84-ით მეტია.
რაც შეეხება მსჯავრდებულებს, მათი რაოდენობა ერთი თვის განმავლობაში შემცირდა 9 631-დან 9 610-მდე, თუმცა, როგორ აღნიშნეთ, ციხეებში პატიმართა საერთო რაოდენობა მაინც მზარდია.
წინა თვეების მსგავსად, დადგენილ ზღვარზე მეტი ადამიანი იმყოფება სამ ციხეში – ქუთაისის (#2 დაწესებულება), თბილისში (#8 დაწესებულება) და ქსანში (#15 დაწესებულება). აღსანიშნავია, რომ ქუთაისისა მე-2 და გლდანის მე-8 დაწესებულებებში, წინა თვესთან შედარებით, პატიმართა რაოდენობა მცირედით ნაკლებია, თუმცა დადგენილ ზღვარს მაინც სცდება.
აღსანიშნავია არასრულწლოვანთა სარეაბილიტაციო დაწესებულება (მე-11 პენიტენციური დაწესებულება თბილისში), სადაც სულ 81 მსჯავრდებულია განთავსებული, ადგილების რაოდენობა კი არის 82. ეს ნიშნავს, რომ თუ მომავალში 1-ზე მეტ არასრულწლოვანს მიუსჯიან პატიმრობას და ამავე პერიოდში, მე-11 დაწესებულებას არავინ დატოვებს, შესაძლოა, დადგენილი ლიმიტს ამ დაწესებულებაში მყოფთა რაოდენობამაც გადააჭარბოს.