რუსთაველის გამზირის სარეაბილიტაციო სამუშაოების დასრულების ვადა ერთი თვით გახანგრძლივდა. Bm.ge წერს, რომ თბილისის მერიასა და პროექტის კონტრაქტორ კომპანია “სმარტ სოლუშენსს” შორის 30 ოქტომბერს გაფორმებული ხელშეკრულების ცვლილებით, სამუშაოების შესრულების ვადა 100-დან 130 კალენდარულ დღემდე გაიზარდა.
დოკუმენტის მიხედვით, მიზეზად მითითებულია “რიგი გაუთვალისწინებელი მოვლენები და ნალექები”. გახანგრძლივება შეეხო რეაბილიტაციის სამივე მონაკვეთს.
“სამუშაოების წარმოების პროცესში გამოვლინდა რიგი გაუთვალისწინებელი ფაქტორები, რამაც წარმოქმნა საპროექტო გადაწყვეტებში ცვლილებების განხორციელების აუცილებლობა და გაზარდა შესასრულებელ სამუშაოთა მოცულობები; საპროექტო ობიექტზე საკუთარი ქსელების რეაბილიტაციას ახორციელებდა არაერთი კომუნიკაციის კომპანია, რაც შპს “სმარტ სოლუშენსს” უზღუდავდა ერთიანი სამუშაო ფრონტის არსებობას და წარმოადგენდა მნიშვნელოვან შემაფერხებელ გარემოებას”, – ნათქვამია ხელშეკრულების ცვლილებაში.
დოკუმენტში ასევე აღნიშნულია უამინდობა. გარემოს ეროვნული სააგენტოს ცნობით, 1 აგვისტოდან 26 ოქტომბრამდე პერიოდში 29 ნალექიანი დღე დაფიქსირდა. მხარეების შეფასებით, უამინდობა სამუშაოების შესრულებას ზღუდავდა არა მხოლოდ ნალექიან დღეებში, არამედ მომდევნო დღეებშიც.
აღსანიშნავია, რომ რუსთაველის გამზირის რეაბილიტაციის მიმდინარეობისას “სმარტ სოლუშენსი” სამუშაოების შესრულების პირობების დარღვევისთვის არაერთხელ დაჯარიმდა.
რუსთაველის რეაბილიტაცია 23 ივლისს დაიწყო და ნოემბრის ბოლოს უნდა დასრულებულიყო.