პოლონეთში შექმნილი ინსტიტუციური კრიზისის ფონზე, ევრობიუროკრატიის დუმილი, “ქართული ოცნებისთვის” ბრიუსელის ორმაგი სტანდარტის მორიგი დადასტურებაა.
ევროგაერთიანების ცალკეულ ლიდერებს, რომლებიც საქართველოს შიდა საქმეებში უხეშად ერევიან, ამ დრომდე არაფერი უთქვათ ოფიციალურ ვარშავაში – საკონსტიტუციო სასამართლოს გარშემო განვითარებულ მოვლენებთან დაკავშირებით. ეს კი, ოფიციალური თბილისისთვის, კიდევ ერთი მაგალითია, რომ ბრიუსელს, რომელიც მათივე თქმით, მუდმივად ახალისებს რადიკალურ პროცესებს, საქართველოს მიმართ უსამართლო დამოკიდებულება და შერჩევითი მიდგომა აქვს, რაც ევროპის სხვადასხვა ქვეყანაში მიმდინარე მძიმე პროცესების ფონზე კიდევ უფრო მკვეთრად ჩანს.
პარლამენტის ფრაქცია “ქართული ოცნების” თავმჯდომარის პირველი მოადგილის, ლევან მაჭავარიანის თქმით, საუბარია, რომ პოლონეთის ხელისუფლება ცდილობს მიიტაცოს მთლიანად საკონსტიტუციო სასამართლო, რაც არის ყოვლად შემაშფოთებელი.
“ძალიან სამწუხარო მოვლენები ვითარდება და რასაც ჩვენ ვხედავთ საჯარო სივრციდან, იქ არის საუბარი, რომ პოლონეთის ხელისუფლება ცდილობს მიიტაცოს მთლიანად საკონსტიტუციო სასამართლო, რაც არის ყოვლად შემაშფოთებელი და ამაზე ღიად საუბრობს პოლონეთის პრეზიდენტი, პოლონეთის ოპოზიციონერები არგუმენტებით, ფაქტებით და ძალიან რთული პროცესები ვითარდება, ძალიან სამწუხაროა, თუ ეს ასე მოხდება, ვინაიდან ჩვენ ამის მაგალითი ევროკავშირის მოქმედ ქვეყანაში უკვე ვიხილეთ. მაგალითად რუმინეთში, როდესაც ბრიუსელს არ აწყობდა საპრეზიდენტო კანდიდატი, რომელმაც გაიმარჯვა პირველ ტურში და პირდაპირ დავალება მისცა საკონსტიტუციო სასამართლოს, რომ აეკრძალათ ეს კანდიდატი და ეს იყო უპრეცედენტო ჩარევა სასამართლო ხელისუფლებაში”, – გნაცხადა ლევან მაჭავარიანმა.