“ქართული ოცნების” დეპუტატი რიმა ბერაძე გარემოვაჭრეების ბრალდებებს პასუხობს, რომლის თანახმადაც ის მათ წინასაარჩევნოდ ხმების სანაცვლოდ გარკვეულ პირობებს აძლევდა. დეპუტატი “ტვ პირველების” კითხვის საპასუხოდ ამტკიცებს, რომ გარემოვაჭრეებთან შეხება არ ჰქონია და მათთვის არც ხმების მობილიზება უთხოვია.
მე რა შეხება მაქვს მეყვავილესთან? ქალაქის მერიის გადაწყვეტილებაა ეს და მიმართეთ ქალაქის მერიას და გაგცემენ პასუხს… ჩუღურეთელები არც არიან ისინი, ერთი ეს და მე არანაირი გავლენა არ მექნება არაჩუღუირეთელზე და ეს როდის იყო, სამი წლის უკან? არასწორი ინფორმაცია გაქვთ… კანონი დაეხმარება, რა გადაწყვეტილებასაც მიიღებს თბილისის მერია, დავეხმარებით იმ ნაწილში, – ამბობს რიმა ბერაძე.
მარჯანიშვილის მეტროს მიმდებარე ტერიტორიაზე ამ დრომდე თბილისის მერიის ინსპექციის თანამშრომლები არიან მობილიზებულები. ისინი გარემოვაჭრეებს ვაჭრობის განახლების საშუალებას არ აძლევენ.
გარემოვაჭრეები მერიის გადაწყვეტილებას აპროტესტებენ, რომლის თანახმადაც გუშინ ღამით მათი დახლები აშალეს და პროდუქციის ნაწილი ნაგავსაყრელზე გადაუყარეს. ისინი იხსენებენ წინასაარჩევნო პერიოდსაც, ამბობენ, რომ მათთან “ქართული ოცნების” წევრი რიმა ბერაძე მიდიოდა და “ქართული ოცნების” სასარგებლოდ ხმებს სთხოვდა.