შეგიძლიათ „პარლამენტის თავმჯდომარე“ თქვათ და ისე მომესალმოთ! – ამ შენიშვნით პარლამენტის თავმჯდომარე შალვა პაპუაშვილმა პლენარულ სხდომაზე ოპოზიციონერ კოლეგას სოფო ხორგუანს მიმართა.
ხორგუანი პარლამენტის ტრიბუნასთან გაზის სამომხმარებლო ტარიფთან დაკავშირებული საკანონმდებლო ინიციატივის შეფასების მიზნით გამოვიდა და გამოსვლა დაიწყო მისალმებით: – “მივესალმები საქართველოს მოქალაქეებს! მოგესალმებით ბატონო შალვა!“ პაპუაშვილმა ხორგუანს რეპლიკით უპასუხა, რომ შეუძლია პარლამენტის თავმჯდომარე თქვას და ისე მიესალმოს.
“მოგესალმებით ბატონო შალვა, როგორც პარლამენტის თავმჯდომარეს! ბატონო შალვა, თქვენ მე გუშინ დამემუქრეთ, რომ ჩემი ნებისმიერი სიტყვა შეიძლება გამოყენებული იყოს სასამართლოზე ჩემს წინააღმდეგ. ბატონო შალვა, მე რომ მუქარის მეშინოდეს, მეც თქვენსავით გერმანულ ან შვეიცარიულ ორგანიზაციაში ვიმუშავებდი – ალბათ, უფრო კერძო, კომერციულ ორგანიზაციაში და ბრძოლაში არ ვიქნებოდი. ამიტომ მუქარებს აზრი არა აქვს. რაც შეეხება სიტყვას – ნებისმიერ სივრცეში ნათქვამ სიტყვაზე ვაგებ პასუხს. ყველა სიტყვა და განცხადება, რომელსაც მე ვაკეთებ, ფაქტებსა და არგუმენტებს ეფუძნება და არა ჭორებსა და შეთქმულების თეორიებს“, – განაცხადა ხორგუანმა პარლამენტის ტრიბუნიდან შალვა პაპუაშვილის მისამართით.
შეგახსენებთ, რომ პარლამენტის თავმჯდომარე შალვა პაპუაშვილმა გუშინ, პლენარულ სხდომაზე სოფო ხორგუანს შემდეგი რეპლიკით მიმართა: „ყველაფერი, რასაც იტყვით, შეიძლება გამოყენებულ იქნეს თქვენ წინააღმდეგ სასამართლოში – კიდევ ერთხელ დაადასტურეთ, რომ არ ცნობთ კონსტიტუციურ ორგანოებს, საკონსტიტუციო სასამართლოს, სხვას კი არაფერს გედავებით!“