პენსიის 1000 ლარამდე გაზრდისა და საპენსიო სესხებზე საპროცენტო განაკვეთების შემცირების მოთხოვნით მოქალაქეები „ლიბერთი ბანკის“ შენობასთან შეიკრიბნენ. პენსიონერების თქმით, ფასების ზრდის ფონზე არსებული პენსია საკვებისა და მედიკამენტების შესაძენად საკმარისი არ არის, ხელისუფლების მიერ დაანონსებული მატება კი მათ ყოველდღიურ საჭიროებებს ვერ ფარავს.
აქციის მონაწილეები საპენსიო სესხების პირობების გადახედვასაც ითხოვენ.
“ვიღებ 472 ლარს, ამით არსებობა გამორიცხულია. მოვითხოვ 1000 ლარს, ყველას მოთხოვნა ეს არის. 1000 ლარი ეს არის კიდევ მინიმუმი, რომ საქართველოში პენსიონერებმა ვიარსებოთ, რომ აი, ჰაერი ჩავყლაპოთ, გამოვიდეთ და შვილიშვილს კამფეტები რომ ვუყიდოთ, მეტი არაფერი”, – ამბობს მოქალაქე.
“1000 ლარზე ნაკლებად ვერ იცხოვრებს ადამიანი, თვითონ 18 ათასები რომ აქვთ ხელფასები, ჩვენ რა ვაკეთოთ? მე მთელი ცხოვრება ვიმუშავე, ვიყავი საერთაშორისო კლასის სპორტის ოსტატი დ დღესდღეობით ლამის დავდგე და ხელი გავიშვირო”, – ამბობს პროტესტის კიდევ ერთი მონაწილე.
ადგილზე „ლელო – ძლიერი საქართველოს“ წარმომადგენლებიც იმყოფებოდნენ. ოპოზიციის წევრები ადგილზე მყოფ პენსიონერებს გაესაუბრნენ, ასევე შეაგროვეს ხელმოწერები, რომელსაც “ლიბერთი ბანკსა” და მთავრობის კანცელარიაში გააგზავნიან.
“დღეს აქ შეგროვდა ხელმოწერები. მივმართავთ “ლიბერთი ბანკს”, რომ შეწყვიტოს ძარცვა, მივმართავთ თურნავას უწყებას, ეროვნულ ბანკს, რომ ჩაერიოს და ერთი დოკუმენტით მოუგვაროს პენსიონერებს ეს პრობლემა”, – ამბობს ქეთი თურაზაშვილი.