ევროკავშირის ელჩის ადგილზე, დმანისში კი არ ვიცეკვებდი, ამ საკითხს მივხედავდი, უდიდესი შეცდომა იყო იანვრამდე ამათი სანქციების გადაწევა, – ამის შესახებ პარტია „ახლის“ ერთ-ერთმა ლიდერმა, ნიკა გვარამიამ „ტვ პირველის“ ეთერში განაცხადა.
მისი თქმით, „ქართულ ოცნებას“ დათმობა სისუსტე ჰგონია, შესაბამისად, შეცდომა იყო ევროკავშირის მხრიდან მმართველი გუნდისთვის სანქციების დაწესებისა და მათ წინააღმდეგ „მკვახე გადაწყვეტილებების“ იანვრამდე გადაწევა. გვარამიას განცხადებით, ევროკავშირის ელჩის, პაველ ჰერჩინსკის ადგილზე ევროპის დღეებისადმი მიძღვნილ ღონისძიებაზე კი არ იცეკვებდა, აღნიშნულ საკითხს მიხედავდა.
„ნებისმიერი დათმობა მათ ჰგონიათ სისუსტე. ახლა რაც გააკეთა ევროკავშირმა, იყო უდიდესი შეცდომა. მე მისი ელჩის ადგილზე დმანისში კი არ ვიცეკვებდი, ამ საკითხს მივხედავდი, პირდაპირ ვამბობ ამ ეთერიდან. უდიდესი შეცდომა იყო იანვრამდე ამათი სანქციების და ძალიან მკვახე გადაწყვეტილების გადაწევა ამათ წინააღმდეგ“, – განაცხადა ნიკა გვარამიამ.
კითხვაზე, ნიშნავს თუ არა ეს, რომ უნდა გაეუქმებინათ ვიზალიბერალიზაცია, გვარამიამ განაცხადა, რომ ვიზალიბერალიზაციის გაუქმებაზე არაფერი უთქვამს, მაგრამ არის მილიონი რამ, რისი გაკეთებაც შეიძლება.
„ვიზალიბერალიზაციის გაუქმებაზე მე არაფერი მითქვამს. მილიონი რამ არის გასაკეთებელი, რაც შეიძლება, გაკეთდეს. ხომ გადასწიეს? რა მოხდა? მეორე დღეს მიიღო ვენეციის კომისიამ უმწვავესი დასკვნა. სხვათა შორის, გრანტების კანონზე ბევრად უფრო მწვავე დასკვნა იყო პარტიების გაუქმების შესახებ კანონმდებლობაზე და განხილვაზე, მაგრამ რა მნიშვნელობა აქვს, ორივე ძალიან, უჩვეულოდ მწვავე იყო ამ ორგანოსთვის. რა მოხდა? ევროკავშირის გადაწევა, ვენეციის კომისიის გადაწყვეტილება და მესამე დღეს ჩანიშნა სამი დღე მიყოლებით პარტიების გაუქმების პროცესი, ზუსტად ის, რაზეც წინა ამ ორმა გადაწყვეტილებამ უთხრა, მთავარია, რომ ეს არ ქნა. თუ იზამ, საერთოდ არ ვილაპარაკებთ შენთან არაფერზე. იმავეს გააკეთებს ზუსტად, არანაირი გრანტების კანონს არ გააუქმებს“, – განაცხადა გვარამიამ.