დავით ოქიტაშვილის განცხადება არის საზოგადოებრივი აზრის მომზადება ამ ორი ადამიანის დასაკავებლად, ვგულისხმობ მამუკა მდინარაძეს და თინათინ რუხაძეს, ვინც მართლა კორუმპირებულია – იქნება სხვა დაჭერებიც, მათ შორის უახლოეს მომავალში, ვის ვგულისხმობ, ამას ვნახავთ ყველა,- ამის შესახებ „კოალიცია ცვლილების“ ერთ-ერთმა ლიდერმა, ნიკა გვარამიამ ჟურნალისტებს განუცხადა.
გვარამია არ გამორიცხავს, რომ “ქართული ოცნების“ მსჯავრდებული ლიდერების ჩამონათვალს მდინარაძე-რუხაძე შესაძლოა „ერთმნიშვნელოვნად შეემატოს”.
„დავით ოქიტაშვილი შეიძლება ასე ფიქრობს მართლა, მაგრამ დარწმუნებული ვარ, მისი განცხადებები რომ ნებადართული არ იყოს ბიძინა ივანიშვილის მხრიდან და მეტიც, დაკვეთილი არ იყოს ბიძინა ივანიშვილის მხრიდან, ეს განცხადებები არ იარსებებდა. ეს არის პროცესის გახსნა, საზოგადოებრივი აზრის მომზადება იმისთვის, რომ ეს ხალხი დაიჭირონ. მე საერთოდ არ მაინტერესებს მათი შიდა გარჩევები, ნამდვილად მჯერა, რომ ეს ორი ადამიანი კორუმპირებულია, მაგრამ მათზე უფრო კორუმპირებული ივანიშვილი რომ დაიჭერს, ჩემთვის ამით არაფერი შეიცვლება. უნდა წავიდეს ყველა. ჩვენი აქციის მთავარ სლოგანს შეგახსენებთ – “საქართველო ივანიშვილის გარეშე”. ეს ავტომატურად გულისხმობს რუხაძის , მდინარაძის, კობახიძის და ყველა დანარჩენის გარეშე, მათი სახელია „ლეგიონი”,- განაცხადა ნიკა გვარამიამ.
მისი თქმით, სუს-ის ყოფილი უფროსის მამუკა მდინარაძის და კულტურის ყოფილი მინისტრის თინათინ რუხაძის „კორუმპირებულობაში ორი აზრი არ არსებობს”.
„ამაში ორი აზრი არ არსებობს და იხილეთ არამხოლოდ პატრიარქის დაკრძალვიდან მოპარული ფული, არამედ ბევრად უფრო მეტი, რომელიც მოიპარეს მაგალითად, ტელეკომპანია „რუსთავი 2”-ის ე.წ. მეგა პროექტების მეშვეობით. ცხადია, ამას ოქიტაშვილი დაკვეთით აკეთებს. ასევე შეგახსენებთ, რომ მარტო ოქიტაშვილი არ არის. ეს არის “ქართული ოცნების” ყველა მოლაპარაკე თავი, შეიძლება ასე ითქვას – ყველა მათი “ტროლი”, რეალური ადამიანები, რომლებიც “ტროლებად” მუშაობენ“,- განაცხადა გვარამიამ.
დავით ოქიტაშვილმა კულტურის ყოფილ მინისტრი, თიკა რუხაძე და სუს-ის ექს-შეფი, მამუკა მდინარაძე ფბ-ზე გავრცელებული პოსტით ამხილა.მისი თქმით, თიკა რუხაძე მას მამუკა მდინარაძის დავალებით ბლოკავდა ყველგან.
„მამუს სძულს ოქიტაშვილი და არ გაეკაროთ!“ – ესეც ხომ თქვენი სიტყვებია?!” – მიმართავს ოქიტაშვილი რუხაძეს.
დავით ოქიტაშვილს რუხაძისგან ასევე აინტერესებს, სად წაიღო პატრიარქის დაკრძალვასთან დაკავშირებული მილიონები.