სიძულვილის ენის წინააღმდეგ პროცესები გრძელდება. თბილისის საქალაქო სასამართლომ 10 დღიანი პატიმრობა შეუფარდა ნიკოლოზ სურმავას, რომელმაც სიტყვიერი შეურაცხყოფა მიაყენა ნანა ტარტარაშვილს.
1500 ლარით დაჯარიმდა ლევან გიორგობიანი, რომელმაც სიძულვილის ენა გიორგი ბურჯანაძის მიმართ გამოიყენა. სასამართლო ასევე მსჯელობს თორნიკე რაზმაძის საქმეზე, რომელიც შეურაცხმყოფელ სიტყვებს საჯარო სივრცეში იყენებდა. პროცესები იმართება ფოთის, ოზურგეთის და თელავის რაინულ სასამართლოებშიც.
როგორც შსს-ს იურიდიული დეპარტამენტის სასამართლოებთან ურთიერთობის სამმართველოს განსაკუთრებით მნიშვნელოვან საქმეთა ინსპექტორი, სალომე ქირია აღნიშნავს, აღნიშნულთან დაკავშირებით ადმინისტრაციული წარმოება ჩატარდა და სამართალდარღვევის არსებობის ფაქტი დადასტურდა:
“ლევან გიორგობიანის მიმართ სამართალდარღვევის ოქმი შედგენილ იქნა 166-ე მუხლის პირველი ნაწილის საფუძველზე, მან სოციალურ ქსელში შეურაცხყოფა მიაყენა ბატონ გიორგი ბურჯანაძეს, აღნიშნულთან დაკავშირებით ჩატარდა ადმინისტრაციული წარმოება, საქმის მასალები თბილისის საქალაქო სასამართლოში გადმოვგზავნეთ. აღნიშნული პიროვნება არ ესწრებოდა საქმის განხილვას, თუმცა მას უწყება ჩაბარებული ჰქონდა. შესაბამისად, სასამართლომ განიხილა დღეს აღნიშნული საქმე, დაადასტურა სამართალდარღვევის არსებობის ფაქტი და ბატონი ლევანის მიმართ გამოყოფილი იქნა ჯარიმა 1500 ლარის ოდენობით.” – აცხადებს სალომე ქირია.