მოლდოვაში კრიპტოვალუტით ვაჭრობის ყალბი პლატფორმების მეშვეობით აშშ-სა და კანადის მოქალაქეების მოტყუების საქმეზე 8 ადამიანი დააკავეს. მოლდოვის პოლიციის ინფორმაციით, ორგანიზებული დანაშაულებრივი ჯგუფი ხუთ ქოლცენტრს მართავდა, ხოლო ერთ-ერთი მათგანის ყოველთვიური შემოსავალი დაახლოებით 2 მილიონ დოლარს შეადგენდა.
ოპერაცია 9 ოქტომბერს ჩატარდა.
გამოძიების თანახმად, ეჭვმიტანილები თავს საინვესტიციო სფეროს ექსპერტებად ასაღებდნენ და ადამიანებს მოგებისა და რისკების შესახებ ცრუ ინფორმაციას აწვდიდნენ, რის შემდეგაც მათ თაღლითურ საინვესტიციო სქემებში ფულის ჩარიცხვისკენ უბიძგებდნენ.
ჩხრეკის დროს სამართალდამცველებმა ამოიღეს ფული, ტელეფონები, კომპიუტერები, ინფორმაციის შესანახი მოწყობილობები, საბანკო ბარათები, საბუღალტრო და კორპორაციული დოკუმენტები, ბეჭდები და სხვა ნივთები. ასევე აღმოაჩინეს რადიოსიგნალების ჩახშობის მოწყობილობები და პოლიგრაფი, რომელსაც დანაშაულებრივ საქმიანობაში ჩასართავად შერჩეული პირების შესამოწმებლად იყენებდნენ.
პოლიციის ცნობით, ჯგუფს იერარქიული სტრუქტურა ჰქონდა. მის წევრებს შორის იყვნენ ქოლცენტრების საქმიანობის კოორდინაციაზე, თანამშრომლების დაქირავებასა და გამოყენებული კომპანიების ფინანსურ და საბუღალტრო მართვაზე პასუხისმგებელი პირები.
დანაშაულებრივ საქმიანობაში ათობით ადამიანი მონაწილეობდა, მათ შორის კამერუნის, ინდოეთის, ისრაელის, ნიგერიის, საქართველოსა და უკრაინის მოქალაქეები.
დაკავებული რვავე პირი წინასწარი დაკავების იზოლატორში გადაიყვანეს. გამოძიება გრძელდება დანაშაულში მონაწილე სხვა პირების გამოსავლენად და დაზარალებულებისთვის მიყენებული ზიანის დასადგენად. მოლდოვის პოლიციის განცხადებაში დაკავებულ პირთა მოქალაქეობა აღნიშნული არ არის.