საქმეები აქტივისტების წინააღმდეგ – პროტესტის ჰიმნად ქცეული სიმღერის გამო, დღეს განაჩენს ოთხი აქტივისტი ელოდება. სხდომები თბილისის საქალაქო სასამართლოში ერთმანეთის მიყოლებით არის ჩანიშნული.
ერთ-ერთი, ვისაც დღეს ასამართლებენ, შშმ პირი დუტა ჯავახიშვილია. სამოქალაქო აქტივისტის თქმით, იმ დღეს როცა შსს-ს ოქმია შედგენილი, საერთოდ არ იმყოფებოდა საკრებულოს ტერიტორიაზე.
დუტა ჯავახიშვილი ამბობს, რომ ამით სახელმწიფო შშმ პირებზე “რეპრესიებს ახორციელებს”.
“შსს მედავება 24 სექტემბერს “ოლე ოლე”-ს სიმღერას საკრებულოსთან, თუმცა, იმ მონაკვეთში საერთოდ არ ვიმყოფებოდი იმ ტერიტორიაზე. მგონია, რომ რეპრესიებს ახორციელებს შშმ პირების მიმართ სახელმწიფო. იმის ნაცვლად, რომ სახელმწიფო ეხმარებოდეს შშმ პირებს, პირიქით რეპრესიებში ამყოფებს და ცდილობს, რომ მაქსიმალურად ხმა არ ამოიღონ.
ახლა მედავებიან იმას, რომ საქართველოს დამოუკიდებლობის დღეს აღვნიშნავდი მწვანე ბოლით და თურმე ეს ყოფილა დანაშაული, რომ საქართველოს დამოუკიდებლობის დღეს აღვნიშნავ. თუმცა ესეც მიმაჩნია, რომ არის აბსურდი და ესეც რეპრესიულ ხასიათს ატარებს”, – ამბობს დუტა ჯავახიშვილი.