ბრიუსელი არის გაბუტვის რეჟიმში, მხოლოდ იმიტომ, რომ საქართველომ უარი განაცხადა პროქსი ქვეყნად გამოყენებაზე და მეორე ფრონტის გახსნაზე, შესაბამისად, მათ მოუწევთ, გადახედონ თავიანთ მიდგომას – ჩვენ მათი მხრიდან მხოლოდ სამართლიან მიდგომაზე გვაქვს საუბარი, – ამის შესახებ „ქართული ოცნების“ დეპუტატმა, ლევან მაჭავარიანმა ჟურნალისტებთან განაცხადა, რითაც გამოეხმაურა ევროკავშირის საგარეო საქმეთა საბჭოს სხდომას, სადაც სხვა საკითხებთან ერთად, საქართველოს საკითხსაც განიხილავენ.
მისივე თქმით, ბრიუსელს მოუწევს იმასთან შეგუება, რომ საქართველოში რევოლუცია ვერ მოახდინეს და „ქართულ ოცნებასთან“ საუბარს გააგრძელებენ.
„სავარაუდოდ, იგივე გზავნილები იქნება, რაც დაიწყო ზუსტად იმ დღიდან, როდესაც უკრაინაში რუსეთის აგრესია დაიწყო. ყველამ კარგად ვიცით, რომ დეზინფორმაცია, სიცრუე და ბრალდებები სწორედ იმიტომ დაიწყო, რომ ჩვენ უარი განვაცხადეთ, პროქსი ქვეყნად გამოეყენებინათ საქართველო. რა თქმა უნდა, ჩვენ ურთიერთობას ვინარჩუნებთ ცალკეულ წევრ ქვეყნებთან და გვაქვს მათთან ურთიერთობები. ბოლოდროინდელი ვიზიტებიც ამას ცხადყოფს, თუმცა ბრიუსელი არის გაბუტვის რეჟიმში, მხოლოდ იმიტომ, რომ საქართველომ უარი განაცხადა პროქსი ქვეყნად გამოყენებაზე და მეორე ფრონტის გახსნაზე. შესაბამისად, მათ მოუწევთ, რომ გადახედონ თავიანთ მიდგომას. ჩვენ მათი მხრიდან მხოლოდ სამართლიან მიდგომაზე გვაქვს საუბარი.
ჩვენ არაერთხელ გაგვიცხადებია, რომ მიუხედავად ამდენი უსამართლობისა, პოლიტიკაში ემოციების ადგილი არ არის და მზად ვართ, გადავფურცლოთ ეს ყველაფერი და ახალი ფურცლიდან დავიწყოთ ურთიერთობა, ვინაიდან, როგორც საქართველოს სჭირდება ევროკავშირი, არანაკლებ სჭირდება ევროკავშირს საქართველო ჩვენი უნიკალური ადგილმდებარეობიდან გამომდინარე. მანამ, სანამ ისინი არ შეიმჩნევენ იმას, რომ საქართველო არის შუა დერეფნის მონაწილე ქვეყანა, მანამ, სანამ ისინი იმ მარტივ ჭეშმარიტებას არ აღიარებენ, რომ ჩვენ ნამდვილად ვესაზღვრებით შავ ზღვას, ამ შემთხვევაში, ზოგადად, საუბარი ზედმეტია. ჩვენ ვფიქრობთ, რომ შუა დერეფნიდან გამომდინარე და გაზრდილი როლიდან გამომდინარე, რაც შუა დერეფანს ეთმობა, მათ მოუწევთ, რომ ადრე თუ გვიან დასხდნენ და ჩვენ გვესაუბრონ. მოუწევთ იმასთან შეგუება, რომ მიუხედავად ამდენი დაფინანსებული რევოლუციისა, ვერ მოახდინეს რევოლუცია საქართველოში და დასხდებიან და ჩვენთან გააგრძელებენ საუბარს“, – განაცხადა მაჭავარიანმა.