რუსეთი ქართული ღვინის მთავარ საექსპორტო ბაზრად რჩება – 2026 წლის იანვარ-აგვისტოში საქართველოდან ექსპორტირებული ღვინის მოცულობის თითქმის 67% სწორედ რუსეთზე მოდიოდა.
რვა თვის განმავლობაში საქართველოდან რუსეთში 102,2 მილიონი დოლარის ღირებულების 34 898 ტონა ღვინო გაიყიდა. მთლიანობაში კი საქართველოდან ექსპორტზე 163,6 მილიონი დოლარის 52 419 ტონა ღვინო გავიდა.
მიუხედავად იმისა, რომ რუსეთი კვლავ პირველ ადგილს იკავებს, მიმდინარე წელს ამ ბაზარზე ქართული ღვინის ექსპორტის მოცულობა 7%-ით, ღირებულება კი 1%-ით შემცირდა.
რუსეთის შემდეგ ქართული ღვინის უმსხვილესი საექსპორტო ბაზრებია პოლონეთი, სადაც 10,7 მილიონი დოლარის ღვინო გაიყიდა, უკრაინა — 7,5 მილიონი დოლარით და ჩინეთი — 6,3 მილიონი დოლარით. ათეულში ასევე შედიან ყაზახეთი, გერმანია, ბელარუსი, აშშ, ლატვია და თურქეთი.
ღვინო რუსეთში საქართველოს მთავარი საექსპორტო პროდუქტია. მნიშვნელოვანი ადგილი უკავია მინერალურ და მტკნარ წყლებსაც, რომელთა ექსპორტის ღირებულებამ რვა თვეში 55,8 მილიონ დოლარს მიაღწია.
ამ მონაცემების ფონზე ცნობილი გახდა, რომ რუსეთმა ქართული წარმოების ღვინისა და სხვა სასმელების ნაწილის იმპორტი დროებით შეზღუდა.
რუსული მედიის ინფორმაციით, მარეგულირებელმა ორგანომ შეზღუდვა პროდუქციის დადგენილ სტანდარტებთან შეუსაბამობით ახსნა. საუბარია ორგანოლეპტიკურ, ფიზიკურ-ქიმიურ და უსაფრთხოების მაჩვენებლებზე.
RBC-ის ცნობით, შეზღუდვა შეეხო „თელიანის ველის“, „თბილღვინოს“, „ასკანელი ძმებისა“ და „ვაინმენის“ ღვინოებს, ასევე „ასკანელი ძმების“ კონიაკს, „საქართველოს ლუდის კომპანიის“ ლუდს, საქართველოში წარმოებულ Coca-Cola-სა და მინერალურ წყალს „ნაბეღლავს“.