პატიმარ გიორგი დავითაძის მამა შვილის მიმართ სავარაუდო ძალადობაში მხილებულ ციხის თანამშრომელს, გიორგი ვარაბიოვს, მწვავედ უპირისპირდება და საქმის ბოლომდე მიყვანას აანონსებს.
მისი თქმით, პენიტენციურ სისტემაში წესრიგის წამებით დამყარება დაუშვებელია.
“კვარაცხელიას, ე.წ. “კვარათი” მონათლული, უამრავი ასეთი ადამიანები ეყოლებათ, დარწმუნებული ვარ. იმიტომ, რომ ეს არ არის ასე ადვილი, რომ თავისი სახელით და გვარით მწამებელი დაფიქსირდეს ციხეებში. ასეთი ახალგაზრდა ადამიანი, როგორიც ის ვარაბიოვია, თავის ასაკიდან გამომდინარე, ამ ასაკში რომ ასეთ სიბინძურეებს პრაქტიკულად განახორციელებ, შენ კაცი არ უნდა გერქვას, შენით შენი ოჯახი არ უნდა ამაყობდეს, შე ნხარ, პირდაპირ გეუბნები, “ღორი!”, არაკაცი და ქვეყნის ზედმეტი მუწუკი. საკუთარი ხელით უნდა თხრიდე მიწას და თავს უნდა იმარხავდე, შენ ისეთი ბინძური და არაკაცი ხარ!
როცა პატიმრებს და ციხეს მართავ ჯალათების მეშვეობით, წამებით ამყარებ წესრიგს, ის ოდესღაც აუცილებლად გასკდება და რა საჭიროება იყო საერთოდ, ჩემი შვილის იქ ჩაყვანა?! როცა გიორგი ჯერ კიდევ თავისივე საკანში ბადრაგის მიერ იყო შემოწმებული? ! რატომ ხვდება იქ ეს ვორობიოვი? თავგასიებული, ღორი ვორობიოვი და რატომ შედის საკანში ამდენი ჯალათ-ბადრაგები და პლიუს ციხის უფროსის მოადგილე? გადაწვენილი ჰყავს 5-6 ბადრაგს მთელი მასით ახრჩობენ ბიჭს და ბოლოს ერთი თანამშრომელი, კადრებში ჩანს, ეუბნება, რომ “ნახეთ, იგუდებაო”. ადამიანი სასჯელს თუ იხდის ციხეში, ეს იმას არ ნიშნავს, რომ იმას უნდა აკადრო ყველაფერი, რომელსაც შენ ზემდგომი ან გარედან ვინმე დაგიკვეთავს.
მე აუცილებლად ამ საქმეს მივიყვან ბოლომდე” – ამბობს ავთანდილ დავითაძე.
“ტვ პირველის’ „შაბათის ეთერის“ ჟურნალისტებმა გაარკვიეს, რომ რუსთავის №6 მკაცრი რეჟიმის ციხის ზედამხედველი, რომელსაც პატიმარი გიორგი დავითაძე გაუპატიურებაში ადანაშაულებს („ბადრაგი თეთრი ხელთათმანებით“), სინამდვილეში 22 წლის გიორგი ვარაბიოვია და არა გიორგი კვარაცხელია, რა სახელითაც ის პატიმრებს ეცნობოდა.
ვარაბიოვის ბებიამ, მზია ყრუაშვილმა, „შაბათის ეთერთან“ დაადასტურა შვილიშვილის ვინაობა და აღნიშნა, რომ პენიტენციურ სისტემაში მათი ოჯახის სხვა წევრებიც მუშაობენ – ვარაბიოვის დედა, ეკატერინე ყრუაშვილი (ქალთა ციხეში) და დეიდა, შორენა ყრუაშვილი.