უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთის მიერ ქალაქ კრამატორსკზე მიტანილი იერიშის შედეგად გარდაცვლილთა რიცხვი, შესაძლოა, კიდევ გაიზარდოს.
მისი თქმით, ავტობუსზე მიტანილი საჰაერო იერიშით 30 გარდაცვლილიდან ნაწილის იდენტიფიცირება ამ დროისთვის ვერ ხერხდება. ზელენსკიმ აღნიშნა, რომ თავდასხმის შედეგად საცხოვრებელი შენობები და მანქანები დაზიანდა.
„რუსული ბომბი ფაქტობრივად ორი ქალაქის მიკროავტობუსებს მოხვდა. დაღუპულთაგან ზოგიერთის ვინაობა მათი დაზიანებების სიმძიმის გამო ჯერ კიდევ არ არის დადგენილი. ვუსამძიმრებ მათ ოჯახებსა და ახლობლებს. დარტყმის შედეგად კიდევ 18 ადამიანი დაშავდა. ასევე დაზიანდა საცხოვრებელი შენობები და მანქანები“, – წერს ვოლოდიმირ ზელენსკი.
განცხადებაში უკრაინის პრეზიდენტი წერს, რომ რუსეთის იერიშები უპასუხო არ იქნება და საპასუხო ზომები მსოფლიომაც უნდა მიიღოს.
„ეს დარტყმა უპასუხოდ არ დარჩება. რუსეთი ცდილობს, დონბასში ყველას სიცოცხლე გაანადგუროს და მსოფლიოს მხრიდან რეაგირება აუცილებელია. ძლიერი რეაგირება – ზუსტად ისეთი, როგორსაც რუსები იმსახურებენ მათ მიერ გამოწვეული ყველა სიკვდილისთვის.“ – აღნიშნავს ზელენსკი.
ცნობისთვის, დღეს რუსებმა უკრაინის რამდენიმე ქალაქზე იერიშები მიიტანეს. თავდასხმის ობიექტები იყო საზოგადოებრივი ტრანსპორტი და მათი გაჩერება.