მიხეილ სააკაშვილის მიერ ირმა სოხაძის მისამართით გავრცელებულ განცხადებას მომღერალი საჯაროდ გამოეხმაურა. ექსპრეზიდენტმა სოხაძის ხელისუფლებისადმი კრიტიკული დამოკიდებულება მისი ოჯახის ისტორიას დაუკავშირა და ვარდების რევოლუციის შემდეგ მისი მეუღლის, რეზო ასათიანის, დაკავებაზე გააკეთა.
მომღერალი ექსპრეზიდენტის მიერ გავრცელებულ ინფორმაციას კატეგორიულად არ ეთანხმება და აცხადებს, რომ მისი მეუღლე “ვარდების რევოლუციის” შემდეგ არ დაუკავებიათ. მომღერალი ასევე უარყოფს, რომ სააკაშვილის ხელისუფლების მიმართ მისი უარყოფითი დამოკიდებულება პირად ან ოჯახურ გამოცდილებას ეყრდნობა.
სოხაძე წერს, რომ განცხადებას საზოგადოებისთვის სიცხადის შეტანის მიზნით აქვეყნებს და არა სააკაშვილისთვის პასუხის გასაცემად:
“ამ ტექსტს ვაქვეყნებ მხოლოდ თქვენთვის, საზოგადოებისთვის. და არა სააკაშვილის პასუხად. საჯაროობა მკაფიოობას ითხოვს და უბრალოდ მინდა ვითარება განიმარტოს. მის ტექსტში მოტანილი ინფორმაცია სიმართლეს არ შეესაბამება – “ვარდების რევოლუციის” შემდეგ არც ჩემი მეუღლე დაუკავებიათ და არც სააკაშვილის ხელისუფლებისადმი ჩემი ურყევად უარყოფითი მიმართებაა განპირობებული პირადი ან ოჯახური გამოცდილებით.
და ის, რომ ექსპრეზიდენტი კვლავაც არ ცნობს მისი რეჟიმის სისასტიკის კრიტიკოსებს და მათ “გაშავებას” ასეთი სულმდაბალი ფორმით ცდილობს, თავისთავად მრავლისმეტყველი ამბავია! ვერანაირი გაკვეთილი ვერ ისწავლეს, ვერც დასკვნები გამოიტანეს. კვლავ ირწმუნებიან, რომ მათ მოწინააღმდეგეებს ყოველთვის “პირადი ინტერესი” ამოძრავებთ!
და კიდევ აქეთ გვამუნათებენ, როგორ გავბედეთ და მათი სისასტიკე გადავირჩიეთ!
რთულ დროში ვცხოვრობთ და ახლა სხვა რეალობასთან გვიწევს ბრძოლა. მე ამ ახალი რეალობის მიუღებლობამ პირადი თუ კარიერული ინტერესების დათმობისკენაც მიბიძგა – ექსპრეზიდენტი ამას ვერ გაიგებს, მაგრამ ბევრი ჩვენგანისთვის ღირებულებები უმნიშვნელოვანესია.
მჯერა, ისტორია ყველაფერს სწორ სახელს დაარქმევს.
მადლობას გიხდით მხარდაჭერისთვის – ამით ეს თემა ჩემი მხრიდან დახურულია”.