ბრალდების მხარეს მიაჩნია, რომ საქმეში წარმოდგენილი მტკიცებულებები უტყუარად ადასტურებს ჩადენილ დანაშაულს და გვაქვს მოლოდინი, რომ დადგება გამამტყუნებელი განაჩენი – ასევე დადგენილია მოტივიც, რომელიც, როგორც თვითონ ბრალდებული აცხადებს, იყო მისი მამოძრავებელი, თუმცა გამოძიების მიერ ასევე გამოკვეთილია სხვა მოტივიც, – ამის შესახებ შარტავას ქუჩაზე მომხდარ, დავით წოწკოლაურის მკვლელობაში ბრალდებული ორი პირის, ლუკა პაპკიაურისა და რომან კალერჯიანის საქმის პროკურორმა, ლევან ვეფხვაძემ განაცხადა.
მისი თქმით, საქმეში წარმოდგენილია ფარული საგამოძიებო მოქმედების ამსახველი ინფორმაცია, სადაც ერთ-ერთი ბრალდებული დანაშაულს აღიარებს.
„საქმეში წარმოდგენილია ფარული საგამოძიებო მოქმედების ამსახველი ინფორმაცია, სადაც ერთ-ერთი ბრალდებული ჰყვება თავის აღიარებით ჩვენებას, ხოლო რაც შეეხება პროცესსა და გამოკითხვას, დუმილის უფლებას იყენებენ.
ჯგუფურად განხორციელდა განსაკუთრებული სისასტიკით მკვლელობა. მიყენებული ჭრილობების ხასიათიდან გამომდინარე, მათ შორის, სახის არეშიც საკმაოდ დიდი ჭრილობა აქვს მიყენებული გარდაცვლილს. ბრალდების მხარე მიიჩნევს, რომ ეს არის განსაკუთრებული სისასტიკით ჩადენილი მკვლელობა. გარდა ამისა, გამოძიების მსვლელობისას მოპოვებული მტკიცებულებებით დადასტურდა, რომ ორივე ბრალდებულს ჰქონდა დანა. შესაბამისად, ორივემ განახორციელა სიცოცხლისათვის შეუსაბამო ჭრილობების მიყენება.
იმას, რომ ისინი მეგობრები იყვნენ, გიდასტურებთ, ხოლო დანარჩენზე უკვე სასამართლო პროცესზე ვისაუბრებთ“,- განაცხადა ლევან ვეფხვაძემ.
ცნობისთვის, ბრალდების თანახმად, ბრალდებულმა, წარსულში არსებული უთანხმოების გამო, ჯგუფურად, ფიზიკურად იძალადეს დავით წოწკოლაურზე და სხეულის სხვადასხვა არეში დანით მრავლობითი ჭრილობები მიაყენეს. მიღებული დაზიანებების შედეგად, წოწკოლაურო შემთხვევის ადგილზე გარდაიცვალა.
დაკავებულებს ბრალდება საქართველოს სისხლის სამართლის კოდექსის 109-ე მუხლის „ი“ და “მ”ქვეპუნქტებით (განზრახ მკვლელობა, ჩადენილი ჯგუფურად, განსაკუთრებული სისასტიკით) წარედგინათ, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.