ყოფილი პრემიერ-მინისტრის, გიორგი გახარიას ადვოკატი ამბობს, რომ ვახტანგ გომელაურს კრიტიკულ კითხვებზე პასუხის გაცემა მოუწევს.
როგორც გიორგი გახარიას ადვოკატმა ბერდია სიჭინავამ განაცხადა, გომელაური თავის გამოკითხვის ოქმში საუბრობს, რომ ჩორჩანას საგუშაგოს შესახებ არ იცოდა, რაც მისი თქმით, სიმართლეს არ შეესაბამება.
ამ წუთებში, თბილისის საქალაქო სასამართლოში ჩვენებას ყოფილი შს მინისტრი ვახტანგ გომელაური აძლევს.
ვახტანგ გომელაურიმაშინ სახელმწიფო უსაფრთხოების სამსახურის უფროსის თანამდებობას იკავებდა. როგორ შეიძლება ოკუპირებულ ქვეყანაში, სახელმწიფო უსაფრთხოების სამსახურის უფროსმა, რომელიც ყველა, ღია თუ ფარული მოტივით აკონტროლებს ქვეყანაში არსებულ ვითარებას, არ სცოდნოდა იმ ვითარების შესახებ, რომელიც ჩორჩანაში 2019 წლის იანვრიდან იყო შექმნილი და როგორ შეიძლება სახელმწიფო უსაფრთხოების სამსახურს არ გაეგო ჩორჩანაში ჯერ გზების გაყვანის, შემდეგ კი საგუშაგოს აღმართვის შესახებ? რა თქმა უნდა, ვახტანგ გომელაურს ეს ინფორმაცია ჰქონდა, მეტიც, არამხოლოდ გომელაურს ჰქონდა ეს ინფორმაცია, ჰქონდა მთელ სამთავრობო კაბინეტს, მათ შორის, სუს-სს.
ვახტანგ გომელაურის მიერ გამოძიებისთვის მიწოდებული ინფორმაცია არ გამომდინარეობს საქმის მასალებიდან და არც ობიექტური რეალობიდან. ვახტანგ გომელაურს კრიტიკულ კითხვებზე პასუხის გაცემა მოუწევს, რადგან ამ ქვეყანაში არ მოიძებნება ადამიანი, რომელიც დაიჯერებს, რომ ოკუპირებულ ქვეყანაში თავდაცვის მინისტრმა, რომელსაც სამხედრო დაზვერვა ექვემდებარება, ასევე სუს-მა, ძალოვანი უწყების პირველმა თუ მეორე პირებმა არ იცოდნენ, რომ ჩორჩანაში საგუშაგო შენდებოდა.
გომელაური თავის გამოკითხვის ოქმში საუბრობს, რომ აღნიშნული საგუშაგოს შესახებ არ იცოდა და თითქოს, სახელმწიფო უსაფრთხოების სამსახური ამის კურსში არ იყო. გომელაურმა თავისივე მიცემული ინფორმაციით, ფაქტობრივად აღიარა, რომ ამ 6-7 წლის განმავლობაში სუს-ის გამოწვევას მალავდა, დანაშაულთან დაკავშირებული ინფორმაცია არ გაამჟღავნა… ამის შემდეგ ბატონი გომელაური სამთავრობო კაბინეტში იყო გიორგი გახარიასთან ერთად და მისი მინისტრი იყო”, – განაცხადა სიჭინავამ.