საბერძნეთში, თესალონიკის პანორამის რაიონში მომხდარი ინციდენტი მოულოდნელი დასასრულით გახდა ცნობილ და მედიის ყურადღებაც მიიქცია. 51 წლის სახლის პატრონმა, რომელმაც 28 წლის ქართველი დამლაგებელი მსხვილი თანხის ქურდობაში დაადანაშაულა, პოლიციიდან საჩივარი უკან გაიწვია, რადგან როგორც აღმოჩნდა “მოპარული“ ფული საკუთარ სახლში ინახებოდა და თავადვე აღმოაჩინა
ბრალდებული საქართველოს მოქალაქე, 28 წლის ქალი იყო. ის იმავე სახლში დამხმარედ მუშაობდა. ბერძნული მედიის ინფორმაციით, 51 წლის ქალბატონმა პოლიციაში განაცხადა, რომ სახლიდან, სადაც ფული ჰქონდა დამალული, 50 000 ევრო და ორი ინგლისური ოქროს მონეტა გაქრა.
პოლიციის თანამშრომლებმა, სასამართლო წარმომადგენლის თანდასწრებით, 28 წლის ქართველის საცხოვრებელ სახლში ჩხრეკა ჩაატარეს, თუმცა ვერც მოპარული თანხა და ვერც ოქროს მონეტები ვერ აღმოაჩინეს.
დაკავებიდან რამდენიმე საათში საქმეში მოულოდნელი ცვლილება მოხდა: სახლის პატრონმა განცხადებული თანხა საკუთარ სახლშივე იპოვა. ამის შემდეგ 51 წლის ქალბატონმა პოლიციას მიმართა და ქართველი დამლაგებლის წინააღმდეგ შეტანილი საჩივარი ოფიციალურად გაიწვია.
საქართველო მოქალაქეს ბრალდება რამდენიმე საათში მოუხსნეს.