რესტორანში პოლიციელის შეურაცხყოფის ბრალდებით ახალციხის საკრებულოში ოცნების დეპუტატის, დავით სამსონიძის შვილი დააკავეს, მოგვიანებით კი სიტყვიერი შენიშვნით გაათავისუფლეს – ამის შესახებ ინფორმაციას ადგილობრივი გამოცემა სამხრეთის კარიბჭე ავრცელებს და წერს, რომ რესტორანში დაპირისპირება 26 სექტემბერს მოხდა. დაკავებული ვლადიმერ (ვაკო) გარსევანიშვილი დღეს, 28 სექტემბერს მოსამართლის გადაწყვეტილებით, სიტყვიერი შენიშვნის საფუძველზე, დარბაზიდან გაათავისუფლეს.
„2026 წლის 26 სექტემბერს ვმორიგეობდით ჩვეულებრივ რეჟიმში, შეტყობინების საფუძველზე, ახალციხეში ურავლის ხეობაში რესტორანი „ედემში“ შემოვიდა შეტყობინება. გამოვცხადდით და ეზოში ნასვამ მდგომარეობაში დაგვხდა ვლადიმერ გარსევანიშვილი, იგინებოდა უმისამართოდ. ძალიან ბევრი სტუმარი იყო. მოვუწოდეთ სიმშვიდისკენ, ჩვენს დანახვაზე გაღიზიანდა მოგვაყენა სიტყვიერი შეურაცხყოფა, დავაკავეთ და გადმოყვანილი იქნა ახალციხის რაიონულ სამმართველოში. იქაც ჩვენს მიმართ, პოლიციელების მიმართ, ძალიან აგრესიულად გამოხატავდა დამოკიდებულებას იგინებოდა, ილანძღებოდა და გატარდა შესაბამისი ღონისძიებები მისი დაკავების“,- განაცხადა პროცესზე სამართალდამცველმა.
თავად ვლადიმერმა სასამართლოზე თქვა, რომ ის „პირადულზე იყო გაღიზიანებული“ და ემოცია ვერ მოთოკა.
„მე ჩემი სიტუაცია მქონდა რაღაცაზე გაღიზიანებული ვიყავი, ესე რომ ვინმეს შეურაცხყოფას ვაყენებდე და აგრესიული სიტუაცია პოლიციის მიმართ მქონდა არანაირი არაფერი არ ყოფილა. მე ვიყავი ჩემს სიტუაციაზე პირადულზე გაღიზიანებული, შემდეგ მოვიდნენ პოლიციელები კი მომიწოდებდნენ დავმშვიდებულიყავი, დავწყნარებულიყავი მე ჩემი გაღიზიანება ვერ მოვთოკე და მათ მიმართაც გამოვხატე სიტყვიერი შეურაცხყოფა. როგორც ასეთე, რომ მე არ დამორჩილებულივი, არ ყოფილა. მე თავიდანვე პოლიციაზე რამე ისეთი განზრახვა არ მქონია“,- თქვა სასამართლოზე ვლადიმერმა.