“საქართველოსა და სამხრეთ ოსეთს შორის შერიგებაზე საუბარი ჯერ ნაადრევია” – აცხადებს რუსეთის ე.წ. ელჩი ოკუპირებული ცხინვალის რეგიონში, მარატ კულახმეტოვი. მისივე თქმით, “საქართველოს ხელისუფლების საჯარო განცხადებები მიუთითებს, რომ ამჟამად სამხრეთ ოსეთთან შერიგების პერსპექტივა არ არსებობს”.
კრემლის პროპაგანდისტულ РИА Новости-სთან ინტერვიუში კულახმეტოვი ამბობს: “მომავალ წელს სამხრეთ ოსეთის მცხოვრებთა აბსოლუტურ უმრავლესობას უკვე ექნება რუსეთის მოქალაქეობა, რადგან პასპორტების გაფორმებისა და გაცემის პროცესი საკმაოდ აქტიურად მიმდინარეობს. სამხრეთ ოსეთის მცხოვრებლების სურვილი, ფლობდნენ რუსულ პასპორტებს, არის რუსეთთან სულიერად ახლოს მყოფი ხალხის ბუნებრივი სწრაფვა”.
2025 წელს პუტინმა ხელი მოაწერა განკარგულებას “აფხაზეთისა და სამხრეთ ოსეთის” მცხოვრებლებისთვის რუსეთის მოქალაქეობის გამარტივებული წესით მინიჭების შესახებ. რუსეთის ფედერაციის პასპორტის მისაღებად მხოლოდ განცხადების წარდგენაა საჭირო.