მოკლული დავით ნარიკანიძის დეიდა მისი მკვლელობის საქმეზე საჯაროდ საუბრობს და აცხადებს, რომ სასამართლომდე საქმის დეტალებზე კომენტარის გაკეთებას არ აპირებდა. მისი თქმით, პროკურორებთან და გამომძიებლებთან შეხვედრის შემდეგ კითხვებზე პასუხები მიიღო და შედეგებით კმაყოფილი დარჩა, თუმცა, როგორც თავად წერს, სოციალურ ქსელში გავრცელებული მიმოწერის გამო, დავითის მკვლელობაზე საუბარი კვლავ მოუწია.
“ამ თემაზე ვფიქრობდი, სასამართლომდე არაფერს დავწერდი. მით უმეტეს მას შემდეგ, რაც პროკურორებსა და გამომძიებლებს შეხვდნენ ეკა და ემზარი, ყველა კითხვაზე მიიღეს პასუხი, დარწმუნდნენ,რომ ისინი გულწრფელად და სრული პასუხისმგებლობით ასრულებენ თავიანთ საქმეს, რისთვისაც მეც მადლობას ვუხდი მათ. შესაბამისად, ამ ეტაპზე საქმეზე საჯაროდ მსჯელობა აღარ ჩავთვალე საჭიროდ.
თუმცა, სამწუხაროდ, მაინც მიწევს დათოს მკვლელობაზე დაწერა. მე მოგიყვებით, რა მოხდა, აქვე ავტვირთავ სქრინებს და საზოგადოებამ თავად შეაფასეთ:
გუშინ, ჩემმა დისშვილმა (ჩემი მეორე დის, თეას შვილმა, ნინომ) ინსტაგრამზე დადო დათოს ვიდეო. ეს „სთორი“ ნახა უცხო გოგომ, დააფოლოვა ნინო და ჰკითხა, თუ ვინ იყო. ამის შემდეგ ნინო გადავიდა მის გვერდზე და ნახა მისი „სთორი“, სადაც ედო მკვლელის ფოტო წარწერით: „Menatrebii” ნინომ დასმულ კითხვაზე პასუხად მიწერა: „იმის და ვარ, ვინც ამან მოკლა“. ამის შემდეგ ეს გოგო დასცინის ნინოს, რომ ის დათოს ვეღარ ნახავს, თვითონ კი ნახავს მკვლელს, ხოლო რა სიტყვებსაც იყენებს, თავადაც ნახავთ.
ჩემს დას ეს მიმოწერა ჯერ არც უნახავს, ახლა მანახეს ბავშვებმა და ვასაჯაროვებ, დაე საზოგადოებამ და მისმა ოჯახმა ნახოს და შეაფასოს ამ მონსტრის “ ადამიანობა”.
ბოდიში, ეკა, რომ ამის ნახვის გამო კიდევ ერთხელ გახდები ცუდად, მაგრამ უნდა დამედო. დაბლა არის მიმოწერის სქრინები, ამ გოგოს ინსტაგრამის გვერდი და მისი საჯარო ფოტოები.” – წერს მაკა მხატვრიშვილი სოციალურ ქსელში.