პარაპლანით ფრენის უსაფრთხოებასთან დაკავშირებით ახალი მოთხოვნები დაწესდა. ცვლილებები ეხება პარაპლანის ფრთის ტექნიკური მდგომარეობასა და მის შემოწმებას. ამასთან, კიდევ ერთხელ ზუსტდება საექსპედიციო ფრენები და ფრენისას სხვა საჰაერო ხომალდებთან ურთიერთობის წესები.
სამოქალაქო ავიაციის სააგენტოს 18 სექტემბრის ბრძანებით, პარაპლანის ფრთის პოროსიის, ანუ ჰაერგამტარობის შემოწმების წესი დეტალურად განისაზღვრა.
ახალი წესით, ფრთის პოროსია სამ წერტილში უნდა შემოწმდეს – ცენტრის, შუა და კუთხის ნაწილებში. მიღებული მონაცემების საფუძველზე გამოითვლება საშუალო მაჩვენებელი, ასევე განისაზღვრება ფრთის ჰაერგამტარობა ლიტრი/მ²/წუთში.
პოროსიის მაჩვენებლის მიხედვით ფრთა ხუთ კატეგორიად ფასდება: „ახალი“, „ახალივით“, „კარგი“, „საშუალო“ და „უვარგისი“.
კერძოდ, ფრთა „ახალად“ ითვლება, თუ მაჩვენებელი 500 წამზე მეტია, „ახალივით“ – 200-500 წამი, „კარგი“ – 70-200 წამი, ხოლო „საშუალოდ“ – 25-70 წამი.
25 წამზე ნაკლები პოროსიის მაჩვენებლის შემთხვევაში ფრთა უვარგისად ჩაითვლება და მისი ექსპლუატაცია აიკრძალება.
ამასთან, თუ ფრთის ასაკი 10 წელს ან მეტს შეადგენს, ან პოროსიის მაჩვენებელი 25-30 წამია, სავალდებულო ხდება ნაჭრის სიმტკიცის დამატებითი შემოწმება სპეციალური ხელსაწყოთი – ბეტსომეტრით (Bettsometer).
ბეტსომეტრით შემოწმებისას ფრთის ნაჭერი მაქსიმუმ 1 კგ (10N) ძალით იტვირთება. ფრთა ვარგისად ჩაითვლება, თუ ნაჭერი მინიმუმ 600 გრამის (6N) დატვირთვას გაუძლებს. თუ ნაჭერი 600 გრამზე ნაკლებ დატვირთვაზე დაზიანდა, ფრთის ექსპლუატაცია დაუშვებელია.
დოკუმენტის მიხედვით, ცალკე დარეგულირდა საექსპედიციო ფრენებიც. ასეთი ფრენის დაწყებამდე უფლებამოსილმა პირმა უნდა გამოსცეს ინდივიდუალური ადმინისტრაციულ-სამართლებრივი აქტი, რომელშიც მითითებული იქნება საფრენი ადგილი, საექსპედიციო ჯგუფის შემადგენლობა და ექსპედიციის ხანგრძლივობა.
ასევე, კიდევ ერთხელ დაზუსტდა პარაპლანით ფრენისას მოქმედი უსაფრთხოების წესები. ფრენა ნებადართულია მხოლოდ შესაბამის ფრენისათვის გამაფრთხილებელ არეებში.
ფრენისას აკრძალულია ნებისმიერი საგნის გადმოყრა ან ნივთიერების გაფრქვევა, ღრუბლების სიახლოვეს ჰორიზონტალურად და ვერტიკალურად 1000 ფუტზე ნაკლებ მანძილზე ფრენა და 3 კილომეტრზე ნაკლები ხილვადობის პირობებში ფრენა. ასევე აკრძალულია ფრენა ტურბულენტურ და როტორულ ზონებში.
პარაპლანის მფრინავი ვალდებული იქნება დაიცვას უსაფრთხო დისტანცია სხვა საჰაერო ხომალდებთან შეჯახების თავიდან ასაცილებლად.
ამასთან, იმავე საჰაერო სივრცეში მყოფი ნებისმიერი ძრავიანი საჰაერო ხომალდი ვალდებული იქნება გზა დაუთმოს პარაპლანს, როგორც ნაკლებად მანევრირებად საჰაერო ხომალდს. თუმცა პარაპლანის მფრინავმა დაბრკოლება არ უნდა შეუქმნას საჰაერო ბურთს, ავარიულ მდგომარეობაში მყოფ საჰაერო ხომალდს ან სამძებრო-სამაშველო ოპერაციაში მონაწილე საჰაერო ხომალდს.
ცვლილებები ძალაშია გამოქვეყნებისთანავე.