ჩორჩანას ეპიზოდზე საქალაქო სასამართლოში პროცესი იმართება. მიუხედავად იმისა, რომ პროკურატურა მოწმეების ვინაობას მალავდა, “ტვ პირველმა” მათი ვინაობა გაარკვია.
ჩვენებას გიორგი გახარიას წინააღმდეგ დღეს “ოცნების” ყოფილი მაღალჩინოსანი კახა კახიშვილი მისცემს. კიდევ ერთი პირი, რომელიც დღეს დასაკითხთა სიაშია, შიდა ქართლის ყოფილი გუბერნატორი, გიორგი ხოჯევანიშვილია. ასევე გამოიკითხება სუსის ხელმძღვანელის ყოფილი მოადგილე ალექსანდრე ტაბატაძე. [ამჟამად პარლამენტის თავდაცვისა და უსაფრთხოების კომიტეტის თავმჯდომარეა] დღევანდელ სხდომაზე სწორედ ამ მოწმეებმა უნდა თქვან, რა იციან ჩორჩანას საგუშაგოს ჩადგმის შესახებ.
ჩორჩანას საქმეზე მიმდინარე დახურულ პროცესს გიორგი გახარიას პარტიაშიც ეხმაურებიან. ბერდია სიჭინავა ამბობს, რომ დაცვის მხარეს წინასწარ არ აქვს ინფორმაცია, კონკრეტულად რომელ მოწმეს დაკითხავენ, თუმცა სიაში ყოფილი და მოქმედი მაღალჩინოსნები არიან. ამასთან, სიჭინავა მოწმეების ნაწილს „ცრუ დამბეზღებლებს“ უწოდებს და ამბობს, რომ მათ ჩორჩანას მოვლენებთან დაკავშირებით არც შესაბამისი ინფორმაცია აქვთ და არც უსაფრთხოების სფეროს სპეციალისტები არიან.
“არ ვიცი დღეს რომელ მოწმეს მოიყვანენ, წინასწარ ამის შესახებ ინფორმაცია არ გვაქვს, ველოდებით ნებისმიერ მოწმეს. გომელაურის გარდა არიან თანამდებობის პირები, რომლებიც დასაკითხ პირთა სიაში არიან. ეს არის კახი კახიშვილი, მთავრობის ადმინისტრაციის ყოფილი ხელმძღვანელი, ალექსანდრე ტაბატაძე, რომელიც იყოს სუსის უფროსის მოადგილე, ირაკლი ანთაძე, მაია ცქიტიშვილი და არიან სხვა ადამიანები. ასევე მეორე კატეგორია მოწმეების, რომლებიც ცრი დამბეზღებლები, შეიძლება დავარქვათ, იმიტომ, რომ ამ ადამიანებს არანაირი ინფორმაცია არ შეიძლება, ჰქონდეთ ჩორჩანასთან დაკავშირებით და არც სპეციალისტები არიან უსაფრთხოების თემის. მამუკა ბახტაძე ზუსტად ისეთივე მოწმე იყო, როგორიც პრემიერ-მინისტრი იყო ამ ქვეყნის. ფაქტობრივად თქვა, რომ გადამდგარი იყო იმ პერიოდისთვის და არაფერს ითანხმებდა. ასევე მამუკა ბხტაძემ, როგორც საჯარო ჩვენებაში აქვს ნათქვამი, თქვა, რომ შეფასებებს ვერ გააკეთებს ჩორჩანას საქმესთან დაკავშირებით” – თქვა დღეს ბერდია სიჭინავამ.
სასამართლო სხდომა დახურულ რეჟიმში მიმდინარეობს.