„კიდევ მოვიპოვეთ გარკვეული მასალები. კერძოდ, ამ დრომდე არ არის გახსნილი და დათვალიერებული გიგა ავალიანის კუთვნილი მობილური ტელეფონი იმ მოტივით, რომ აღნიშნული ტელეფონი ვერ გაიხსნა. ვინაიდან დაცვის მხარე ატარებს სრულყოფილ გამოძიებას, მნიშვნელოვნად ჩავთვალეთ, რომ დაგვენიშნა ექსპერტიზა მობილური ტელეფონის გახსნის მიზნით ისრაელში. ისრაელის ექსპერტები უნდა ჩამოვიდნენ საქართველოში. აღნიშნული წერილობითი კორესპონდენცია, რომელიც დაკავშირებული იყო ექსპერტიზის ჩატარებასთან, დამატებით წარვადგინეთ სასამართლოში და სასამართლომ ისინი დაუშვა განსახილველად” – განაცხადა ნია იმნაძის ადვოკატმა გიორგი ლეკიშვილმა სასამართლო სხდომის დასრულების შემდეგ.
თბილისის საქალაქო სასამართლოში დღეს გიგა ავალიანის საქმეზე დაკავებული არასრულწლოვანების, ნია იმნაძისა და ანასტასია ბერუაშვილის სასამართლო პროცესი გაიმართა.
გიგა ავალიანის გარდაცვალების საქმეზე პროკურატურამ ორ არასრულწლოვანს – ნია იმნაძესა და ანასტასია ბერუაშვილს ბრალი 6 აგვისტოს წაუყენა. იმნაძეს ჯგუფურად ჯანმრთელობის განზრახ მძიმე დაზიანების წაქეზებას ედავებიან, რაც 13 წლამდე ვადით თავისუფლების აღკვეთას ითვალისწინებს. ბერუაშვილს კი განსაკუთრებით მძიმე დანაშაულის შეუტყობინებლობას, რაც 7 წლამდე ვადით თავისუფლების აღკვეთას გულისხმობს.
საერთო ჯამში, საქმეზე დაკავებულია 7 პირი – ალექსანდრე გაბაშვილი, გიორგი რიკაძე, ანი ნასყიდაშვილი, დემეტრე ჩიქოვანი, გიორგი მალანია, ნია იმნაძე და ანასტასია ბერუაშვილი. მათგან ოთხი – ალექსანდრე გაბაშვილი, გიორგი რიკაძე, ანი ნასყიდაშვილი და დემეტრე ჩიქოვანი მსჯავრდებულები არიან.