სულ რაღაც ერთი კვირის წინ სასწავლო წლის დაწყება უნდა მიგველოცა ჩვენი ბავშვებისთვის, მაგრამ ფაქტია, რომ განათლების სისტემაში სრული კოლაფსია – ამის შესახებ პარტია “გახარია საქართველოსთვის” ერთ-ერთმა ლიდერმა, ტატა ხვედელიანმა განაცხადა.
მისი თქმით, კოლაფსის “მთავარი მიზეზი – ირაკლი კობახიძის ეგრეთ წოდებული განათლების რეფორმაა რომლის შედეგია: სწავლის დაწყებიდან სამ დღეში სკოლების გარეშე დარჩენილი კიდევ 4000-მდე ბავშვი და 400-მდე მასწავლებელი, ასევე სავარაუდო კვებითი ინტოქსიკაციის დიაგნოზით კლინიკებში შეყვანილი 100-ზე მეტი ბავშვი მოუტანა”.
პარტია ითხოვს:
განათლების სამინისტრომ ინფრასტრუქტურის სამინისტროსთან ერთად დაუყოვნებლივ გამოაქვეყნოს იმ სკოლების სრული სია, სადაც სწავლის შეჩერებაა გადაწყვეტილი, შესაბამისი საექსპერტო დასკვნებით, დაუყოვნებლივ მოიძიოს ალტერნატიული ვარიანტები და წარმოადგინოს თითოეული სკოლისთვის სასწავლო პროცესის აღდგენის გეგმა.
პასუხისმგებელმა უწყებებმა საზოგადოებას პროაქტიულად მიაწოდონ ინფორმაცია ბაღებში ბავშვების ჯანმრთელობის მდგომარეობის, ინტოქსიკაციის შესაძლო მიზეზების, შემოწმების შედეგების და შემთვევის პრევენციისთვის ჩატარებული ღონისძიებების შესახებ.
ყოველგვარი წინასწარი გაფრთხილების გარეშე დაიკეტა თბილისის 21-ე, წყალტუბოს მე-2, სენაკის მე-3, ხაშურის მე-5, მე-7, წალკის მუნიციპალიტეტის სოფელ ავრანლოს, უთაისის მე-17 მისაქციელის, ველისციხის, გურჯაანისა და მარტვილის სკოლები.
ქაოსისა და განუკითხაობის რეჟიმში ყოველდღიურად ჩვენი მოქალაქეები იგებენ ახალი საგანმანათლებლო დაწესებულების დახურვის შესახებ.
მაშინ, როდესაც სკოლებისა და ბაღების ასაშენებელი ფული „ოცნების“ სისტემური კორუფციის გამოა გაფლანგული, ბავშვები დაპირებულ ახალ სასკოლო შენობებს წლებია ამაოდ ელიან და მეორე და მესამე ცვლაში განათლების მისაღებად ყოველდღე კილომეტრებს გადიან.
არსებობს უამრავი პასუხგაუცემელი კითხვა, რომლებსაც არც ერთი ანგარიშვალდებული უწყება არ პასუხობს:
თუ შენობები ბავშვებისთვის საშიში იყო რატომ დაიწყო იქ სწავლა? რას აკეთებდნენ პასუხისმგებელი პირები სასკოლო არდადაგების დროს, როდესაც ხდება დაწესებულების მომზადება მომდევნო სასწავლო წლისთვის?
თუ რეაბილიტაციის აუცილებლობა დადგა, რატომ არ არის კრიზისული გეგმა, ალტერნატიული ვარიანტები და რატომ შეწყდა სწავლის პროცესი ბავშვებისთვის?
ბაღებში განვითარებულ მოვლენებზე – ბავშვების ჯანმრთელობასა და კვებით უსაფრთხოებაზე პასუხისმგებელი არცერთი უწყება არ ასრულებს საკუთარ ფუნქციას და არ აწვდის მოსახლეობას ინფორმაციას მიზეზების, ბავშვების ჯანმრთელობის მდგომარეობისა და პრევენციული ღონისძიებების შესახებ.
ქვეყანაში ისედაც გამოწვევების წინაშე მდგომი განათლების სისტემა ჯერ არასდროს ყოფილა ასე ჩამოშლილი და დანგრეული, რაზეც პასუხისმგებლობა ეკისრება პირადად ირაკლი კობახიძეს”- თქვა ხვედელიანმა.