არჩევნების შედეგები იზომება თითოეული პოლიტიკოსის განვლილი ოთხწლიანი საქმიანობით. შენი მოსახლეობის ინტერესებს როცა გადააყოლებ ომის დღის წესრიგს და სხვების ინტერესებს, შემდეგ არჩევნებზე ამ ტიპის შედეგები არ უნდა გაგიკვირდეს, – ამის შესახებ ევროპასთან ინტეგრაციის კომიტეტის თავმჯდომარემ ლევან მახაშვილმა გერმანიაში ჩატარებულ არჩევნებსა და ფრიდრიხ მერცის განცხადებასთან დაკავშირებით აღნიშნა.
მახაშვილის თქმით, ძალიან მკაფიო იყო გერმანიის მოსახლეობის არჩევანი – მათ არ სურთ ომის დღის წესრიგი.
„შედეგებმა მკაფიოდ აჩვენა, რომ მიწებზე გერმანიის მოსახლეობას ომის დღის წესრიგი არ უნდა. მათ გაუთავებელი გლობალური, თუ გეოპოლიტიკური მობილიზაცია არ უნდათ. მათი არჩევანი ძალიან მკაფიო იყო. ამ წლების განმავლობაში ისინი ითხოვდნენ ღირსეულ დასაქმებას, ღირსეულ სამუშაო ადგილებს, მშვიდობას, სტაბილურობას, საზღვრების კონტროლს და საზოგადოებრივ წესრიგს. ამის ნაცვლად, სრულიად სხვა რამ მიიღეს. ამიტომ, მათ შორი გერმანიის კანცლერი, არჩევნების შედეგებით გაკვირვებული არ უნდა იყოს. შეიძლება, შედეგები არ მოეწონა, ეს გასაგებია, მაგრამ შედეგები ასეთია. გერმანიის არჩევნებზე არ ვისაუბრებდი, მაგრამ გასული წლების განმავლობაში ჩვენ გვესმოდა საქართველოს ხელისუფლების მიმართ არაერთი უსამართლო, ცილისმწამებლური პოზიცია. რატომ? იმიტომ, რომ საქართველოს ხელისუფლება მოსახლეობის თხოვნით და დაკვეთით საკუთარ ქვეყანას იცავდა. იცავდა საზოგადოებას ომში ჩართვისგან. იცავდა საზღვრებს და საზოგადოებრივ წესრიგს. საზოგადოებას უკონტროლო მიგრაციისგან იცავდა. საქართველოს მოსახლეობამ თავისი მკაფიო არჩევანი გააკეთა 2024 წელს და შემდეგ 2025 წელს ადგილობრივ არჩევნებში. გერმანიის მოსახლეობამ რა არჩევანიც გააკეთა, ჩემი აზრით, არასწორ საშინაო, თუ საგარეო პოლიტიკასთან დაკავშირებით, ესეც კარგად ვნახეთ“, – განაცხადა ლევან მახაშვილმა.
წინასწარი მონაცემებით, გერმანიის მეკლენბურგ-წინა პომერანიის მიწაზე რეგიონულ არჩევნებში „ალტერნატივა გერმანიისთვის“ ხმების 38.2 პროცენტს აგროვებს, ფრიდრიხ მერცის პარტია კი 4.9 პროცენტით ბარიერს ვერ ლახავს. გერმანიის კანცლერმა, ფრიდრიხ მერცმა მეკლენბურგ-წინა პომერანიაში არჩევნების შედეგებს „კატასტროფული“ უწოდა.