თბილისის კლინიკებში ინტოქსიკაციის ნიშნებით კიდევ 11 ბავშვი შეიყვანეს – ინტერპრესნიუსი ციციშვილის კლინიკის სამედიცინო დირექტორზე დაყრდნობით წერს, რომ მათთან 3 ბავშვია შეყვანილი. მაია ჩხაიძის ცნობით, ამ ეტაპზე ციციშვილის სახელობის ბავშვთა ახალ კლინიკაში 8 ბავშვი მკურნალობს. TV ფორმულა კი ავრცელებს ინფორმაციას, რომ იაშვილის კლინიკაში კიდევ 8 მცირეწლოვანია შეყვანილი.
“დღეს დილის მდგომარეობით, იაშვილის კლინიკაში რჩება 13 პაციენტი. ყველას მდგომარეობა არის სტაბილური. ყველას ერთიდაიგივე ჩივილები აქვს ფაქტობრივად – გულისრევა, პირღებინება და მსუბუქი მუცლის ტკივილი” [ფორმულა] – ამბობს პედიატრი სოფიო ცერცვაძე.
მთავარს თბილისის რამდენიმე საჯარო საბავშვო ბაღის მშობლებმა ბავშვების მასობრივი ინტოქსიკაციის შესახებ აცნობეს. როგორც ისინი გვიყვებოდნენ, გვიან ღამით საავადმყოფოებში მოზარდები პირღებინებითა და მუცლის ტკივილით შეიყვანეს. მათივე ინფორმაციით, რამდენიმე ბაღი დღეს დილიდან დაიკეტა. მშობლებს არ აქვთ პასუხი, რას შეიძლება გამოეწვია ბავშვების სავარაუდო მოწამვლა. მათივე ინფორმაციით, მოწამლულია 20-ზე მეტი ბავშვი. რაც შეეხება ბაღებს, საიდანაც ბავშვები სხვადასხვა საავადმყოფოებში გადაიყვანეს, როგორც მშობლები ამბობენ, მათ შორისაა, თბილისის 109-ე, 124 -ე, 46 -ე, 121-ე, 79-ე, 22-ე, 59-ე საბავშვო ბაღები. მთავარის ინფორმაციით, ბავშვები მარნეულის და წყალტუბოს საბავშვო ბაღებშიც მოიწამლნენ.
ამ ინფორმაციის გავრცელების შემდეგ განცხადება გაავრცელა ფინანსთა სამინისტროს საგამოძიებო სამსახურმა – უწყებამ ბაგა-ბაღებში ინტოქსიკაციის ფაქტზე გამოძიება დაიწყო. როგორც მათ მიერ გავრცელებულ ინფორმაციაშია ნათქვამი, “თბილისში მდებარე 20 ბაგა-ბაღის 55 აღსაზრდელსა და 1 აღმზრდელს ინტოქსიკაციის ნიშნები აღენიშნება”.