ირაკლი კობახიძის შეთავაზებას, რომლის მიხედვითაც აქციების დროს დაკავებულებს დანაშაულის აღიარებისა და მონანიების შემთხვევაში გათავისუფლების შესაძლებლობა ექნებათ, იურისტები აფასებენ. მათი განცხადებით, პატიმრებს უფლება აქვთ თავად გადაწყვიტონ, დათანხმდებიან თუ არა შეთავაზებულ პირობას, თუმცა ეს ვერ შეცვლის მათ შეფასებას დაკავებებისა და ქვეყანაში მართლმსაჯულების მდგომარეობის შესახებ.
იურისტი ირაკლი აბესაძე ამბობს, რომ პატიმრებს მსგავსი გადაწყვეტილების მიღების სრული უფლება აქვთ, თუმცა, მისი შეფასებით, ხელისუფლება მათ შესაძლო განცხადებებს საკუთარი პოლიტიკური მიზნებისთვის ვერ გამოიყენებს.
ადამიანებს სრული მორალური და სამართლებრივი უფლება აქვთ მოიქცნენ ასე, მაგრამ არანაირი სამართლებრივ საფუძველი, მითუმეტეს, მორალური და პოლიტიკური საფუძველი, რომ შემდგომ “ქართულმა ოცნებამ” და ივანიშვილმა ეს საკუთარი ამოცანების შესასრულებლად გამოიყენონ, არ არსებობს. შეუძლებელია ვინმე დასავლეთში პატიმრის მიერ დაწერილი წერილის საფუძველზე დარწმუნდეს, რომ მართლმსაჯულება მურუსიძის მიტაცებულ სასამართლოში ხორციელდება კონსტიტუციით და მართლმჯსაულების უზენაესი პრინციპების დაცვით. ასე რომ, ვინც წერს ამ განცხადებებს, ყველას ვულოცავ თავისუფლებას. რაც შეიძლება მალე ყველა სინდისის და პოლიტიკური პატიმარი უნდა ვნახოთ გარეთ, მაგრამ ივანიშვილის და “ოცნების” მცდელობა, რომ ეს გამოიყენოს საკუთარი ამოცანების მისაღწევად, ღრმად ვარ დარწმუნებული, რომ არის, უბრალოდ, განწირული, – ამბობს ირაკლი აბესაძე.
ადვოკატი ბექა ბასილაია კი კობახიძის შეთავაზებაში ხელისუფლების პოლიტიკურ ინტერესს ხედავს და ამბობს, რომ მონანიება, საპროცესო შეთანხმება თუ შეწყალება აქციების დროს დაკავებულთა მიმართ რეალურ შეფასებას ვერ შეცვლის.
ხელისუფლების ინტერესი, ამ შემთხვევაში, არ არის ჰუმანური აქტის განხორციელება, არამედ სწორედ იმ ფაქტის გადაფარვა, მცდელობა, რომ ეს ადამიანები არიან სინდისის პატიმრები. თუმცა, კიდევ ერთ რამეს უნდა გაესვას ხაზი, რაც არ უნდა საპროცესო შეთანხმებაზე იყოს საუბარი ან რაც არ უნდა მონანიებაზე იყოს საუბარი, რაც არ უნდა შეწყალებაზე იყოს საუბარი, იმ ფაქტს ვერავინ გადაფარავს, რომ ყველა ის პირი, ვინც აქციებზე იქნა დაკავებული წლების მანძილზე, ყველა ეს ადამიანი არის რალურად სინდისის პატიმარი, – ამბობს ბექა ბასილაია.
ირაკლი კობახიძე აქციების დროს დაკავებულ ადამიანებს გარკვეულ გარიგებას სთავაზობს – “ქართული ოცნების” პირობა ასეთია: “მოინანიეთ და აღიარეთ დანაშაული”.