ჩვენ ყველას ვუსურვებთ წარმატებას ივანიშვილის წინააღმდეგ ბრძოლაში, ოღონდ არა „ნაციონალური მოძრაობის“, მიხეილ სააკაშვილის წინააღმდეგ ბრძოლაში, – ამის შესახებ „ნაციონალური მოძრაობის“ დროებითი მმართველი საბჭოს თავმჯდომარემ, ირაკლი ფავლენიშვილმა განაცხადა.
„ხალხი უკვე დაიღალა ამ მუდმივი თავდასხმებით, ამიტომაც ნამდვილად აღარ ვაპირებ, ჩავერიო ამ თავდასხმებში. ვიმეორებ, ყველას ვუსურვებ წარმატებას რაც არ უნდა მათი ქმედებები, განცხადებები ყოფილიყო ჩვენთვის მიუღებელი, ივანიშვილს თუ შეებრძოლებიან, დაუპირისპირდებიან, ვუსურვებ წარმატებას. ვისურვებდი, მალე შეწყვიტონ ბრალდებები, ცილისწამება და ჭორები „ნაციონალური მოძრაობასთან“ დაკავშირებით“, – განაცხადა ფავლენიშვილმა.
რაც შეეხება ლევან ხაბეიშვილის პოსტთან დაკავშირებით დასმულ კითხვას, რომელშიც ხაბეიშვილმა უმოქმედობა გააკრიტიკა და „შიშის დაძლევისა და გამბედავი ნაბიჯების“ საჭიროებაზე ისაუბრა, ფავლენიშვილმა აღნიშნა, რომ იზიარებს ამ გზავნილს.
„რა თქმა უნდა, ვიზიარებ ამ გზავნილს, ამიტომაც ვაკეთებ ამ განცხადებას, რომ აღარ ვაპირებ მუდმივად ერთი და იმავეს საუბარს. ყველამ ყველაფერი გაიგო, დებატებზე სამწუხაროდ არ დასხდნენ ადამიანები იქით მხრიდან. ახლა საჭიროა ივანიშვილის წინააღმდეგ ბრძოლა და ყველას ვუსურვებ წარმატებას, რაც არ უნდა თავდასხმებს ჰქონოდა ადგილი, მათი მხრიდან ჩვენს წინააღმდეგ“, – აღნიშნა ფავლენიშვილმა.