თბილისის მასშტაბით რამდენიმე საბავშვო ბაგა-ბაღში საკვებით ინტოქსიკაციის ფაქტები დაფიქსირდა.
თბილისის საბავშვო ბაგა-ბაღების მართვის სააგენტოს ცნობით, 7 საჯარო ბაღში სააღმზრდელო პროცესი შეჩერდა, დანარჩენი 183 ბაღი კი აგრძელებს ფუნქციონირებას, მიზეზი რამდენიმე საჯარო ბაღში დაფიქსირებული ინტოქსიკაციის ნიშნებია. მათივე ცნობით, სააგენტო ყველა შესაბამის უწყებასთან ერთად მათ შორის თბილისის ეპიდემიოლოგიური ზედამხედველობის სამსახურთან.
აღნიშნულის შესახებ 182-ე ბაგა – ბაღის აღსაზრდელის მშობელი ნათია ბედენაშვილი საუბრობდა. მისი თქმით, მისი 5 წლის შვილიც მოიწამლა და ამჟამად გამოჯანმრთელებას სახლის პირობებში აგრძელებენ.
“ვაზისუბანში 182-ე ბაღში დადის ჩემი 5 წლის შვილი. გუშინ მივიყვანე ჩვეულებრივ, ბავშვი უჭმელია ზოგადად, არ ჭამს ბაღში საჭმელს და რომ ვკითხე რა ჭამე-მეთქი, რძე დავლიე და კარაქიანი პური ვჭამე ცოტაო, სხვა არაფერიო.
ბავშვი საღამოს რომ მოვიდა სახლში, დაიძინა, რომ გაიღვიძა უკვე 8 საათისთვის საღამოს, სამჯერ ჰქონდა ფაღარათი, მერე მუცელიც აიტკივა, სიცხემაც აუწია 40 გრადუსამდე. თავიდან ვირუსი მეგონა, რას წარმოვიდგენდი მოწამვლას. თან გუშინ არანაირი ინფორმაცია არ იყო გამოქვეყნებული, რომ სხვა ბავშვებიც მოიწამლნენ.
დილას რომ შევედი ჩვენი მშობლების ჩატში, ყველა წერდა, რომ ბავშვები მასიურად მოწამლულან ჩვენს ბაღში და ზოგადად თბილისში. მასწავლებელს რომ დავურეკე, მითხრა, რატომ მოიწამლნენ არ ვიცი ჯერ, ინფორმაცია არც მე მაქვსო. მაინტერესებს, საერთოდ კონტროლდება ბაღებში საკვები?
ახლა წერს ერთი ადამიანი სოციალურ ქსელში. 15 სექტემბერს ჰერკულესის ფაფა სულ მატლებით იყო სავსე, ეს მასწავლებელმა ნახა და მოახსნევინა ფაფა, მაშინ რეაგირება რომ მომხდარიყო, გუშინ ეს ფაქტი არ მოხდებოდაო. მართლა მაინტერესებს ვინ აკონტროლებს ამას? ჯერ იყო ამ გაზაფხულზე კერძო სკოლაში მოიწამლნენ ბავშვები და საჯარო ბაღებში რა შედის ხომ წარმოგიდგენიათ. დავრეკე სურსათის უვნებლობის ეროვნულ სააგენტოში და მოვითხოვე პასუხი, რა ხდება-თქო, მითხრეს, რომ კვლევა დაიწყეს, გამოძიება მიმდინარეობს და ამის შემდეგ დაგიბრუნებთ პასუხსო. რისთვის არსებობს ეს სააგენტო, თუ არ ამოწმებს საკვები რა შედის და გვითხრან, რატომ არის ასეთი მასიური სახის მოწამვლა? რამ გამოიწვია? ბოლომდე არც იძახიან რა მოხდა, ამბობენ ასეთი ინტოქსიკაცია ბაქტერიულ მოწამვლას ახასიათებსო. რა ბაქტერია შეიჭრა იმ პროდუქტში, კონკრეტულად რა პროდუქტი იყო, არ ვიცით, რადგანაც ბევრი რძეს ასახელებს. ესე იგი რძეში იყო რაღაც, იმიტომ რომ ჩემს შვილს არ უჭამია ხორცი და სხვა პროდუქტი.
სხვა მშობლებიც იძახდნენ, რომ რძე დალიესო. ალბათ უფრო რძეში იყო ეს ბაქტერია, მაგრამ ეგ არის გამოსაძიებელი, რა წარმომავლობის იყო და ხომ არ იყო ვადაგასული.
მე სახლში ვებრძვი ახლა ამ ინტოქსიკაციას, სიცხეც აქვს. წუხელ ჰქონდა სამჯერ გულისრევა და დღეს ამ დრომდე აღარ არევია, მერე რა იქნება არ ვიცი. საჭმელს როგორც ჭამდა ისევე იღებდა. დღეს ჯერ საჭმელი არ უჭამია. ჩვენი ბაღში გვითხრეს მხოლოდ სამი ბავშვი ზის ჯგუფშიო. ფაქტობრივად დაკეტილია ეს ბაღიც. არ ვიცი ხვალ როგორ უნდა მივიყვანოთ ბავშვი რომც კარგად იყოს, როგორ დავრწმუნდეთ რომ უსაფრთხო საჭმელს აჭმევენ ჩემს შვილს. როგორღა უნდა ენდო ადამიანი.
ისიც პრობლემაა 40 ბავშვი რატომ უნდა იჯდეს ჯგუფში? ყველანაირი ეპიდემია გავრცელდება, ეს ბავშვების რაოდენობაც პრობლემა არის. სურსათის უვნებლობა ამბობს წელიწადში სამჯერ ვამოწმეთო, ეს არ არის აშკარად საკმარისი,“ – აცხადებს ნათია ბედენაშვილი.