“საჭიროა კიდევ ერთი გვირაბი, კიდევ, კიდევ და კიდევ…” – რას ამბობს მარატ კამბოლოვი

“რუსეთსა და სამხრეთ ოსეთს შორის აუცილებელია კიდევ რამდენიმე მარშრუტის მშენებლობა, რომლებიც პირდაპირ დააკავშირებდა ერთმანეთთან ორივე მხარეს” – ამის შესახებ ე.წ. რესპუბლიკის პრეზიდენტის მოვალეობის შემსრულებელმა, მარატ კამბოლოვმა Вести-სთვის მიცემულ ინტერვიუში განაცხადა. “საჭიროა კიდევ ერთი გვირაბი, კიდევ, კიდევ და კიდევ… თანამედროვე ტექნოლოგიების პირობებში ეს სრულიად შესაძლებელია“, – აღნიშნა მან.
A-164 ტრანსკავკასიური მაგისტრალი ერთადერთი სახმელეთო გზაა, რომელიც როკის გვირაბზე გადის და რუსეთს ოკუპირებული ცხინვალის რეგიონთან აკავშირებს. ზვავების, ქვათაცვენისა და უამინდის გამო, ეს მარშრუტი პერიოდულად იკეტება.
ოკუპირებულ ცხინვალში ე.წ. საპრეზიდენტო არჩევნები მიმდინარეობს. “არჩევნებში” კენჭს 4 კანდიდატი იყრის: მარატ კამბოლოვი (ე.წ. პრეზიდენტის მოვალეობის შემსრულებელი – წარდგენილია ე.წ. ამომრჩეველთა საინიციატივო ჯგუფის მიერ), ზურაბ კოკოევი (წარდგენილია ე.წ. პარტია „ერთიანობის“ მიერ), მურატ ვალიევი (ე.წ. პარტია „ალანიის პატრიოტები“) და კაზბეკ კოდოევი (წარდგენილია ე.წ. ამომრჩეველთა საინიციატივო ჯგუფის მიერ). ოკუპირებულ ცხინვალში ჯამში 70 ე.წ. საარჩევნო უბანი გაიხსნა, ერთი “უბანი” გაიხსნა მოსკოვში, 4 კი ჩრდილოეთ ოსეთში