ახმეტის მუნიციპალიტეტის სოფელ ქვემო ალვანში 10 წლის ბავშვის მიმართ შესაძლო იძულების შესახებ გავრცელებულ ინფორმაციაზე შინაგან საქმეთა სამინისტრომ გამოძიება დაიწყო. საქმე სისხლის სამართლის კოდექსის 150-ე მუხლით, იძულების ფაქტზე დაიწყო.
ინფორმაციას გამოცემა “მთავარი ამბები კახეთიდან” ავრცელებს.
დადგენილია ინციდენტში მონაწილე პირი და ახმეტის პოლიციის სამმართველოში მიმდინარეობს საგამოძიებო მოქმედებები, მათ შორის გამოკითხვები.
შემთხვევის შესახებ ინფორმაცია გამოცემამ გუშინ, მშობლის მიერ გავრცელებულ ინფორმაციაზე დაყრდნობით დაწერა.
როგორც მოზარდის დედა ამბობდა, ფაქტი გასულ კვირას, სოფლის მოსაცდელთან მოხდა.
მისი თქმით, ბავშვი ცეკვის რეპეტიციიდან ბრუნდებოდა, რა დროსაც ასაკოვანმა მამაკაცმა სახლში წაყვანა შესთავაზა. უარის მიღების შემდეგ კი კაცი ავტომობილში მის ძალით ჩასმას შეეცადა.
ბავშვმა თავის დაღწევა მოახერხა და ახლომდებარე მაღაზიის მიმართულებით გაიქცა.