“კოლეგებად დავრჩებით” – რას ეუბნება პაპუაშვილი გახარიას გუნდს

კოლეგებად დავრჩებით – ასე ეხმაურება პაპუაშვილი გიორგი გახარიას პარტიას.

პარლამენტის თავმჯდომარე შალვა პაპუაშვილი „გახარია საქართველოსთვის“ შესაძლო აკრძალვის ფონზე აცხადებს, რომ პარტიის დეპუტატები „ქართული ოცნების“ წევრების კოლეგებად დარჩებიან – მიუხედავად იმისა, რა გადაწყვეტილებას მიიღებს საკონსტიტუციო სასამართლო. მისი თქმით, მმართველი გუნდი პარტიის აკრძალვას ითხოვს, თუმცა მისი წევრებისთვის საპარლამენტო მანდატების შეწყვეტას არ აპირებს.

სხვათაშორის, შემთხვევით არ მითქვამს, მადლობას ველით,-თქო, იმიტომ, რომ, როგორც იცით, გუშინ უმრავლესობის ლიდერმა განაცხადა კიდეც ბრიფინგზე, რომ ჩვენ არ ვითხოვთ მანდატების შეწყვეტას, ასე რომ, კოლეგებად დავრჩებით კვლავ, მიუხედავად იმისა, რა გადაწყვეტილებას მიიღებს სასამართლო, – განაცხადა შალვა პაპუაშვილმა.

“ქართული ოცნება” ასაკრძალი პარტიების სიას კიდევ ერთს ამატებს – “გახარია საქართველოსთვის”.

როგორც ცნობილია, 2025 წლის 31 ოქტომბერს “ქართულმა ოცნებამ” საკონსტიტუციო სასამართლოში შეიტანა სარჩელი და შემდეგი პოლიტიკური გაერთიანებების აკრძალვა მოითხოვა :

„ერთიანობა – ნაციონალური მოძრაობა“
„კოალიცია ცვლილებისთვის“
„ძლიერი საქართველო – ლელო“
ამის შემდეგ, მიმდინარე წლის აპრილში “ქართულმა ოცნებამ” სიას “ფედრალისტები” დაამატა, რაც იმას ნიშნავს, რომ ეს ახალ სარჩელად ითვლება და ამ 9-თვიანი ვადის ათვლა თავიდან იწყება.

გახარიას პარტიის დამატების შემთხვევაში სასამართლოს სამსჯელოდ მიეცემა კიდევ დამატებით 9+2 თვე.