შვედეთში არსებობს ჩვეულება, რომლის დასახელებაც ორი სიტყვის გაერთიანებას წარმოადგენს. შვედურიდან „Fredag“ ნიშნავს „პარასკევს“, ხოლო „mysig“ შეიძლება ითარგმნოს როგორც „სიმყუდროვე“, „კომფორტის შეგრძნება“ ან „რაღაც სასიამოვნო“. მიუხედავად იმისა, რომ „fredagsmys“ ისე ჟღერს, თითქოს მრავალი თაობის არსებული ტრადიცია იყოს, სინამდვილეში ის XX საუკუნის 80-იან და 90-იან წლებში ჩამოყალიბდა. ამის შესახებ interia kobieta წერს.
„ეს ცნება ცხოვრების აჩქარებული ტემპის საპასუხოდ გაჩნდა და ის კვების მრეწველობამაც კი აიტაცა. წასახემსებლების ერთ-ერთმა პოპულარულმა ბრენდმა იმ დროს წარმატებული სარეკლამო კამპანია წამოიწყო და ეს სლოგანი კვირის დასასრულის ოჯახურ გარემოში აღსანიშნავად გამოიყენა. შვედებს ეს იდეა იმ დონეზე შეუყვარდათ, რომ მარკეტინგული კონცეფცია მომენტალურად იქცა კულტურის განუყოფელ ნაწილად“, – ნათქვამია სტატიაში.
ამ შვედური ტრადიციის წესები რთული არ არის და სწორედ ამაში მდგომარეობს მისი განსაკუთრებულობაც. ჩვეულების საფუძველი ყოველგვარი დაძაბულობისა და წნეხის არარსებობაა. „როდესაც პარასკევს სამუშაო კვირის სირთულეების დავიწყება გვსურს, იზრუნეთ სახლში მშვიდ დასვენებაზე — მარტო, ოჯახის წევრებთან თუ უახლოეს მეგობრებთან ერთად. ეს არ არის გენერალური დასუფთავების ან უხვი ვახშმის მომზადების დრო. შვედები უპირატესობას ანიჭებენ კომფორტულ ტანსაცმელს, მარტივად მოსამზადებელ წასახემსებლებს, მოსახერხებელ სავარძელსა და თბილ პლედს“, – ვკითხულობთ პუბლიკაციაში.
ასეთ კომფორტში ისინი კითხულობენ წიგნებს, უყურებენ ფილმებს ან ერთობიან სამაგიდო თამაშებით. ამასთან, სასიამოვნო ატმოსფეროს თბილი განათება ან ანთებული სანთლები ქმნის.
„ამ რიტუალის ყოველკვირეულ განრიგში დანერგვა ტვინს ეხმარება, უფრო მარტივად გადაერთოს ამოცანების შესრულების რეჟიმიდან დასვენების რეჟიმზე. მოქმედებათა მუდმივი სქემა სტრესის დონის სწრაფად შემცირების საშუალებას იძლევა და მკაფიოდ მიჯნავს სამუშაო კვირას შაბათ-კვირისგან, რომელიც ძალების აღდგენას ეძღვნება“, – ირწმუნება გამოცემა.
კერძოდ, ბევრი ადამიანი შაბათ-კვირას მორიგი საქმეების გასაკეთებელ დროდ აღიქვამს. ისინი აკეთებენ დიდ საყიდლებს, ატარებენ გენერალურ დასუფთავებას, გეგმავენ მგზავრობას ან შეხვედრებს მეგობრებთან. ამის გამო ორშაბათს ადამიანები კიდევ უფრო დაღლილები იღვიძებენ.
„ამის გამო ღირს შვედებისგან მაგალითის აღება, მით უმეტეს შემოდგომის დადგომასთან ერთად. სულ უფრო მოკლე დღეები და ამინდის გაუარესება ხელს უწყობს სახლში მყუდრო ატმოსფეროს შექმნას. „Fredagsmys“ საშუალებას იძლევა, გადატვირთული ნერვული სისტემა სამუშაოს დასრულებისთანავე „გადავიტვირთოთ“. ჩვენ უფრო მარტივად გადავდივართ დასვენების რეჟიმში, რის წყალობითაც შაბათ-კვირა უფრო ხანგრძლივი და ხარისხიანი გვეჩვენება“, – ვკითხულობთ სტატიაში.