აშშ-ის დღევანდელი ადმინისტრაციის კრიტიკა და მასთან ახლო ურთიერთობის აკრძალვა – თბილისში კვლავ შეფასებების თემაა მარტა კოსის განცხადება, რომელმაც თქვა, რომ კანდიდატმა ქვეყნებმა ევროკავშირში გაწევრიანებისთვის ტრამპის მოძრაობასთან ურთიერთობა უნდა გაწყვიტონ. გაფართოების საკითხებში კომისარი ირწმუნება, რომ ტრამპის ორგანიზაცია ცდილობს ევროპელები დაარწმუნონ, თითქოს ევროპული ცივილიზაცია და ეკონომიკა დაღმასვლას განიცდის და ევროპაში ნამდვილი დემოკრატია არ არსებობს.
საპარლამენტო უმრავლესობის წევრის, ლევან მაჭავარიანის განცხადებით, ბრიუსელი ევროპელ ხალხს ფსევდოლიბერალურ იდეოლოგიასა და არალეგალურ მიგრაციას ახვევს თავს, ხოლო აშშ-სთან ურთიერთობის გაფუჭებით უსაფრთხოების გარანტიებს კარგავს.
“ტრაგიკული მდგომარეობაა – ერთის მხრივ, ევროკავშირმა უარი თქვა იაფ ენერგორესურსებზე და გაუძვირდა ცხოვრება ევროპელ ხალხს, მეორეს მხრივ, თავს ახვევენ ულტრა მემარცხენე, ფსევდოლიბერალურ იდეოლოგიას, რომელიც არ არის ევროპელი ხალხის დაკვეთა, მესამეს მხრივ, წალეკეს ევროპის ქვეყნები უკონტროლო, არალეგალური მიგრანტებით და მეოთხეს მხრივ, ყოველდღიურად აფუჭებენ ურთიერთობას ისეთ ძლიერ პარტნიორთან, როგორიც არის ამერიკის შეერთებული შტატები და უსაფრთხოების ის ქოლგა, რომლის გარანტორიც სწორედ ამერიკის შეერთებული შტატები იყო ევროკავშირისთვის ამდენი ათწლეულის განმავლობაში, ნელ-ნელა ხელიდან ეცლება.
შესაბამისად, ბრიუსელის ამ უგუნური პოლიტიკიდან გამომდინარე, ყველა ეს მიმართულება, რაც მე ჩამოვთვალე, დღის წესრიგში დგას დღესაც, რომელიც არ არის ევროპელი ხალხის დაკვეთა. ეს ყველაფერი არის თავს მოხვეული, ეგრეთ წოდებული Deep State-ის მხრიდან, იმისათვის, რომ ევროკავშირი მათ ხელოვნურად დაასუსტონ,” – აცხადებს ლევან მაჭავარიანი.