საქსონიის პოლიციამ გიორლიცთან, გრაუშტაინის ქვესადგურის ტერიტორიაზე, მაღალი ძაბვის ელექტროგადამცემი ხაზების სიახლოვეს კიდევ ცხრა ხელნაკეთი ასაფეთქებელი მოწყობილობა აღმოაჩინა. ამგვარად, რეგიონში აღმოჩენილი მსგავსი მოწყობილობების საერთო რაოდენობამ 21-ს მიაღწია.
გამოძიების ინფორმაციით, მოწყობილობები ენერგეტიკულ ინფრასტრუქტურაზე თავდასხმისთვის იყო განკუთვნილი. გამოძიებას საქსონიის სისხლის სამართლის პოლიციის სამმართველო და ფედერალური პროკურატურა აწარმოებენ. თავდასხმების სავარაუდო ორგანიზატორი, 28 წლის დანიელ ვ. კვლავ ძებნილია.
მანამდე ცნობილი გახდა, რომ 7 სექტემბრის ღამეს ბერლინში, მიტეს რაიონში, სამშენებლო მოედანზე გაჩენილი ხანძარი ელექტროქვესადგურზე გავრცელდა, სადაც ხანძრის რამდენიმე კერა გაჩნდა და რამდენიმე აფეთქება მოხდა. მომხდარის ზუსტი მიზეზები ჯერჯერობით დგინდება.
წინა საღამოს ქალაქ ვეზელში, ჩრდილოეთ რაინ-ვესტფალიის ფედერალურ მიწაზე, პოლიციამ კომპანია RWE-ის ქვესადგურის ღობეში ხვრელი აღმოაჩინა. სამართალდამცველების განცხადებით, ქვეყნის მასშტაბით მსგავსი ობიექტების პატრულირება გაძლიერდა.
პირველი სექტემბრიდან გერმანიაში მსგავსი ინციდენტები არაერთ ქალაქში მოხდა. ქვეყნის შინაგან საქმეთა სამინისტროში მიიჩნევენ, რომ ყველა ეს შემთხვევა შესაძლოა ე.წ. „კლიმატურ ექსტრემიზმს“ უკავშირდებოდეს.