თბილისში 18 ათასზე მეტ მოსწავლეს სწავლა სხვა უბნის სკოლაში მოუწევს. მიზეზი სკოლების გაჭიანურებული რეაბილიტაციაა. კორუფციის მკვლევრების ინფორმაციით, დედაქალაქში არაერთი სკოლის სარემონტო სამუშაოები დროულად ვერ დასრულდა, ზოგიერთი შენობა კი იმდენად მძიმე მდგომარეობაშია, რომ რეაბილიტაციის ნაცვლად მისი თავიდან აშენებაა საჭირო.
სასწავლო ინფრასტრუქტურის რეაბილიტაციის პროცესში შექმნილი შეფერხებები სახელმწიფოს დამატებით ხარჯებსაც უქმნის. მხოლოდ მოსწავლეების დროებით სკოლებში ტრანსპორტირება, არსებული გათვლებით, დაახლოებით 3.5 მილიონი ლარი დაჯდება.
მხოლოდ თბილისში 18 717 მოსწავლეს არ ექნება სკოლა და ამ ბავშვებს სხვა სკოლაში სატრანსპორტო საშუალებით მოუწევთ გადაადგილება. ახლა ჩემს ზურგს უკან რომელი სკოლაც არის, ამ სკოლის მოსწავლეებს გივი მიქანაძემ პრიორიტეტად განუსაზღვრა სკოლის ფორმა. სკოლა, რომელიც 5 წელზე მეტია ასეთ მდგომარეობაშია, ყველა არჩევნებზე და კრიზისის დროს “ქართული ოცნების” მინისტრები, მაჟორიტარები, როგორც საკრებულოსი, ისე პარლამენტის წევრები, ჩამოლაგდებიან აქ, შეკრებენ მოსახლეობას და ყოველ წელს ჰპირდებიან, რომ დაიწყებენ მშენებლობას. განათლების სისტემაში პრიორიტეტებია გამოსაკვეთი, – ამბობს კოალიცია ცვლილებისთვის წევრი ბესიკ დონაძე.
დედაქალაქის გარდა ამ კუთხით გამოწვევებია რეგიონებშიც. მოსწავლეებს აქ სწავლა ავარიულ შენობებში უწევთ, რაც ადგილობრივების თქმით, საფრთხის შემცველია.
ველოდებით, რომ იქნება ამაზე რეაგირება და სკოლა უნდა ჩაჯდეს პროგრამაში. ეს სკოლა რეაბილიტაციას არ, აშენებას საჭიროებს. რომც მოხდეს რესტავრაცია ვერ დააკმაყოფილებს ფიზიკურად ავტორიზაციისთვის საჭირო პირობებს. ამის შესახებ ინფორმაცია აქვს როგორც განათლების სამინისტროს, რესურსცენტრს. სწავლა მიმდინარეობს, ჩვენ რა გავაკეთოთ?, – ამბობს ბულაჩაურის სკოლის დირექტორის მოადგილე.