მედიკამენტები მალე საქართველოში იქნება და ჩვენთვის ახალი ცხოვრების ხანა იწყება – ბავშვები მოუთმენლად ელოდებიან, – ამის შესახებ დიუშენის კუნთოვანი დისტროფიის მქონე ბავშვის მშობელმა, თაკო გოგალაძემ ჟურნალისტებთან განაცხადა.
მისივე თქმით, “ეს არის ყველას ერთობლივი გამარჯვება”.
„მარტივი არ იყო გზა, რომელიც გავიარეთ. იყო რთული დღეები, თუმცა გვიხარია, რომ ჩვენი მიზანი რეალობაში მოდის. ის, რაც წარმოუდგენელი გვეჩვენებოდა 1 წლის წინ, არის რეალობა. მედიკამენტი, რომელიც უმთავრესი იყო, ჩვენთან იქნება 7 ან 8 სექტემბერს, მეორე მედიკამენტთან დაკავშირებით კი პროცესები დასასრულს უახლოვდება. ეს ჩვენთვის არის უსაზღვრო სიხარული. ბავშვები მოუთმენლად ელოდებიან. ეს არის ყველას ერთობლივი გამარჯვება. მინდა ყველას დიდი მადლობა გადაგიხადოთ – თითოეულ მხარდამჭერს, ჟურნალისტს. სექტემბერი ჩვენთვის ძალიან დიდი სიხარულით დაიწყო, მედიკამენტები მალე საქართველოში იქნება და ჩვენთვის ახალი ცხოვრების ხანა იწყება,” – განაცხადა თაკო გოგალაძემ.
ცნობისთვის, ჯანდაცვის მინისტრის, მიხეილ სარჯველაძის განცხადებით, დიუშენის კუნთოვანი დისტროფიის მქონე ბავშვების სამკურნალო მედიკამენტი „ჯივინოსტატი“ თბილისში მომდევნო კვირის დასაწყისში ჩამოვა. მისივე თქმით, დიუშენით დაავადებული ბავშვების სამკურნალო კიდევ ერთ მედიკამენტთან დაკავშირებით პროცესი წარმატებით მიმდინარეობს.