„იმედს ვიტოვებთ, რომ რეგულაცია ყველა მიმწოდებელზე გავრცელდება და ისეთი დოკუმენტი არ დაიდება, რომლის შემუშავების პროცესშიც არ იქნებიან ჩართული მონაწილე მხარეები“, – ასე აფასებს დისტრიბუტორთა ასოციაციის პრეზიდენტი ლაშა რიჟამაძე მთავრობის ინიციატივას, რომლის მიხედვითაც სურსათის მიწოდების ჯაჭვში უსამართლო სავაჭრო პრაქტიკების რეგულირება იგეგმება.როგორც ლაშა რიჟამაძემ „ბიზნესპრესნიუსს“ განუცხადა, აღნიშნული კანონის მიღება ასოციაციის ერთ-ერთი მრავალწლიანი მოთხოვნაა და მისი არსებობა ადგილობრივი მწარმოებლებისა და სადისტრიბუციო კომპანიებისთვის პრიორიტეტულ მნიშვნელობას ატარებს.
თუმცა, მისივე თქმით, მნიშვნელოვანია, რეგულაცია მხოლოდ ადგილობრივ მწარმოებლებსა და საცალო ვაჭრობის ქსელურ ობიექტებს შორის ურთიერთობით არ შემოიფარგლოს და მიწოდების ჯაჭვში ჩართული ყველა მხარის ინტერესები გაითვალისწინოს.
„ეს არის ის კანონი, რომლის ინიცირებისა და მიღების შესახებ ასოციაციას ჯერ კიდევ წლების წინ ჰქონდა მოთხოვნა დაყენებული. ადგილობრივი მწარმოებელი და სადისტრიბუციო კომპანიებისთვის ეს ერთ-ერთი ყველაზე პრიორიტეტული საკითხია და მთლიანად სექტორისთვის არის მნიშვნელოვანი ამ კანონის არსებობა.