საქართველოს ახალგაზრდა იურისტთა ასოციაცია ადვოკატ ია სირანიშვილის მიერ გავრცელებულ ინფორმაციას საგანგებო განცხადებით ეხმაურება.
გუშინ იურისტმა თქვა, რომ ელიზბარაშვილის სახლის ჩხრეკისას პოლიციელებმა მასზე იძალადეს და ძალის გამოყენებით ხელი შეუშალეს პროფესიულ საქმიანობაში.
საია მოუწოდებს პროკურატურას, ია სირანიშვილის განცხადების საფუძველზე დაუყოვნებლივ დაიწყოს გამოძიება.
„საია მოუწოდებს საქართველოს ადვოკატთა ასოციაციას, დაუყოვნებლივ შეისწავლოს აღნიშნული ფაქტი და გამოიყენოს მის ხელთ არსებული ყველა მექანიზმი ადვოკატის პროფესიული უფლებებისა და დამოუკიდებლობის დასაცავად.
ამასთან, მოვუწოდებთ საქართველოს პროკურატურას, დაუყოვნებლივ დაიწყოს აღნიშნულ ფაქტთან დაკავშირებით გამოძიება და უზრუნველყოს შესაძლო დანაშაულის ჩამდენ პირთა დროული გამოვლენა.
ადვოკატის პროფესიულ საქმიანობაში ჩარევა და მის მიმართ ძალადობა სრულიად შეუთავსებელია სამართლებრივი სახელმწიფოს პრინციპებთან და საფრთხეს უქმნის არა მხოლოდ კონკრეტული ადვოკატის უფლებებს, არამედ საადვოკატო საქმიანობის დამოუკიდებლობასა და მართლმსაჯულების განხორციელებას“, – აცხადებს საია.
თამაზ ელიზბარაშვილის ადვოკატის, ია სირანიშვილის თქმით:
„5-მა კაცმა, 5-მა პოლოციელმა წიხლებით გამიგდეს, ესენი პოლიციელები არიან თუ კრიმინალები?! ასეთი რამე ცხოვრებაში არ გამომიცდია, ადვოკატს წიხლებს ურტყამდნენ! რომელ დაცვაზეა ლაპარაკი!“ – თქვა ადვოკატმა მას შემდეგ, რაც ელიზბარაშვილი სამართალდამცველებმა დააკავეს და მანაც შენობა დატოვა.
თამაზ ელიზბარაშვილი ადმინისტრაციული წესით მისი სახლის ჩხრეკისას დააკავეს.
რამდენიმე საათით ადრე, შინაგან საქმეთა სამინისტროს თანამშრომლებმა თამაზ ელიზბარაშვილი, ლისზე საკუთარ სახლთან შეაჩერეს. პოლიციელებმა ელიზბარაშვილი მანქანიდან გადმოიყვანეს ავტომობილი გაჩხრიკეს.
მოგვიანებით ჩხრეკა დაიწყო ელიზბარაშვილის სახლსა და თავშესაფარშიც.