რუსულ ნავთობზე დაწესებული სანქციებისთვის გვერდის ავლის სავარაუდო ერთ-ერთი ფაქტის შესახებ თადარიგის პოლკოვნიკი, შსს-ს სასაზღვრო დეპარტამენტის სანაპირო დაცვის ყოფილი თანამშრომელი, გოჩა ბერიძე საუბრობს:
“მიმდინარე წლის 15 აგვისტოს საქართველოს საპასუხისმგებლო საზღვაო ზონაში შემოვიდა ლიბერიის დროშის ქვეშ მცურავი ტანკერი ვუნდერ სარტი, რომელსაც გემის ოფიციალურ მონაცემებში ეწერა, რომ დანიშნულების პორტი იყო ყულევი.
მიუხედავად ამისა, ტანკერი ყულევის პორტში არ შესულა და იმავე რიცხვში ტანკერი გაჩერდა დროებით ოკუპირებული აფხაზეთის საზღვაო მონაკვეთში. სოხუმის ტრავერსი, ნაპირიდან დაახლოებით 35 მილში.
4 დღის შემდეგ, 19 აგვისტოს ტანკერმა გათიშა AIS სისტემა და გათიშული ჰქონდა 4 დღის განმავლობაში. 23 აგვისტოს, ტანკერმა ჩართო სისტემა და დაფიქსირდა უკვე ფოთის ტრავერსზე და მოძრაობდა თურქეთის მიმართულებით.
საბოლოო ჯამში მოხდა ის, რომ ტანკერმა დაიტვირთა 37 ათასი ტონა რუსული ნედლი ნავთობი, რომლის საბაზრო ღირებულება დღეის მდგომარეობით შეადგენს 24 მილიონ დოლარს და წაიღო ისე, რომ თითქოს ეს ნავთობი წაიღო ყულევის პორტიდან.
ამ ფაქტთან დაკავშირებით, პროკურატურას და სუს-ს თუ რაიმე კითხვა გაუჩნდება შეუძლიათ მიმართონ სანაპირო დაცვის დეპარტამენტს, ვინაიდან ამ ყველაფერს სანაპირო დაცვის დეპარტამენტის სარადარო სისტემები ხედავდნენ და ასევე შეუძლიათ მიმართონ საზღვაო ტრანსპორტის სააგენტოს ვინაიდან, საზღვაო ტრანსპორტის სააგენტოს ელ-არ-აი-ტის სისტემა და ტანკერის აისის გათიშვის პერიოდში, მაინც ხედავდა მის მოძრაობას.
მათ სრული ინფორმაცია გააჩნიათ თუ სად დაიტვირთა ტანკერი, დროებით ოკუპირებული საზღვაო მონაკვეთის ტერიტორიაზე ღია ზღვაში, რუსეთის საპასუხისმგებლო საზღვაო მონაკვეთზე ღია ზღვაში, თუ რუსეთის რომელიმე პორტში – ამბობს გოჩა ბერიძე გავრცელებულ ვიდეომიმართვაში.