“ტვ პირველმა” მოიპოვა მასალა, რომელიც “კრედო” ბანკში განხორციელებული სავარაუდო ფიზიკური ანგარიშწორების შემდეგ ბათუმშია გადაღებული.
ვიდეოში დაზარალებული კაცი ცემის მოტივით ინტერესდება – “გასალახი იყავი და გაგლახეთ” – პასუხოებენ მას სავარაუდო ანგარიშსწორებაში მონაწილები პირები.
მასალა ახლა საქმის ერთ-ერთი მტკიცებულება – ის დაზარალებულმა კაცმა გამოძიებას უკვე გადასცა და საქმეშიც ჩაიდო.
მომხდარზე განცხადება გაავრცელა “კრედო ბანკმაც:
“კრედო ბანკისთვის ცნობილია 2026 წლის 26 აგვისტოს ფილიალში, თანამშრომელსა და მომხმარებელს შორის, მომხდარი ინციდენტის შესახებ. საკითხს სრული პასუხისმგებლობით ვეკიდებით და ამ ეტაპზე მიმდინარეობს შემთხვევის დეტალური გადამოწმება. ინფორმირებულია შესაბამისი სახელმწიფო უწყებებიც.
ვინაიდან მოკვლევა ჯერ არ დასრულებულა, შეფასებების გაკეთება ნაადრევია. ბანკის მთავარი პრიორიტეტი როგორც მომხმარებლების, ისე თანამშრომლების უსაფრთხოებისა და ღირსების დაცვაა.
ფაქტობრივი გარემოებების დადგენის შემდეგ, ბანკი მიიღებს შესაბამის გადაწყვეტილებას მოქმედი პროცედურებისა და კანონმდებლობის სრული დაცვით”.
მოქალაქე ამბობს, რომ ბათუმში “კრედო” ბანკის ერთ-ერთ ფილიალში ჯგუფურად სცემეს – კაცის მტკიცებით, მას რამდენიმე პირმა ბანკის შენობაში წიხლები და მუშტები ურტყა.
ბანკის მომხმარებლის მონაყოლის თანახმად, ანგარიშსწორება მენეჯერის კაბინეტში დაიწყო და შემდეგ ფოიეში გაგრძელდა.
როგორც კაცი “ტვ პირველს” უყვება, თავდაპირველად მას სესხის თაობაზე კრედიტოფიცერმა დაურეკა, რის შემდეგაც ბანკში ინფორმაციის გადასამოწმებლად მივიდა, თუმცა იქ “საქმეები ქუჩურად ურჩიეს”.