საქართველო მოციგურავეთა საერთაშორისო ტურნირს უმასპინძლებს – ზუსტად ერთ თვეში, ბათუმის ყინულის სასახლეს 37 ქვეყნიდან ეწვევიან ფიგურულ ციგურაობაში მოასპარეზე სპორტსმენები.
ირკვევა, რომ რუსი მოციგურავეების წყვილი, ზლატა კამალოვა და დანილ პანოვი, საქართველოს სახელით იასპარეზებენ. ამის შესახებ ინფორმაციას თავად საქართველოს ფიგურული ციგურაობის ფედერაცია ავრცელებს.
„გაიცანით ჩვენი ნაკრების ახალი წევრები – ზლატა კამალოვა და დანილ პანოვი, ნაკრების ერთერთი დამსახურებული მწვრთნელის, პაველ სლიუსარენკოს გუნდიდან. დანილი და ზლატა სპორტული წყვილების კატეგორიაში იასპარეზებენ, მათი დებიუტი ახალგაზრდათა გრან პრის ეტაპზე სულ მალე შედგება!“ – წერს ფედერაცია ინსტაგრამის გვერდზე.
“რადიო თავისუფლების” ინფორმაციით, პაველ სლიუსარენკო აქამდე საქართველოს ნაკრების წევრებს, ლუკა ბერულავასა და ანასტასია მეტელკინას წვრთნიდა, რომლებმაც საქართველოს სახელით არაერთ წარმატებას მიაღწიეს, მათ შორის, ზამთრის ოლიმპიურ თამაშებზე საქართველოს პირველი მედალი, ვერცხლი, მოუტანეს.
23 აგვისტოს რუსულ მედიაში გავრცელებული ინფორმაციით, ბერულავასა და მეტელკინას წყვილი ცნობილი რუსი მწვრთნელის, ეთერი თუთბერიძის გუნდში გადავიდა.