მაქვს განცდა, რომ სწორედ ამ წერილებით ირაკლი ღარიბაშვილი ცდილობდა ახალი ბრალდებები გარკვეულწილად გადაეფარა და სპეკულირება მოეხდინა, – ასე უპასუხა ჟურნალისტების შეკითხვას განათლების მინისტრმა, გივი მიქანაძემ, რომელიც ყოფილი პრემიერ-მინისტრის, ირაკლი ღარიბაშვილისთვის ახალი ბრალის წარდგენას ეხებოდა.
როგორც მან აღნიშნა, „ქართული ოცნება“ კორუფციასთან ბრძოლაში შეუვალია.
„ქართული ოცნების“ პასუხისმგებლობის საკითხია ის, რომ გამოავლინოს ყველა კორუფციული მომენტი და პასუხისგებაში მისცეს ის ადამიანები, რომლებიც ამ კორუფციაში იყვნენ ჩართულები, მიუხედავად იმისა, მას რა თანამდებობა ეკავა თუ უკავია. ამას არ აქვს მნიშვნელობა. ჩვენ ვართ შეუვალი კორუფციასთან ბრძოლაში. ამის ნათელი დასტურია და კონკრეტული მტკიცებულებებით ჩანს, რომ უმაღლესი რანგის პირები არიან მხილებულნი კონკრეტული დანაშაულის ჩადენაში. ამ შემთხვევაში ჯერ მხოლოდ ბრალზეა საუბარი და უდანაშაულობის პრეზუმფციიდან გამომდინარე მე წინმსწრებით ვერაფერს ვიტყვი. „ქართული ოცნების ხელისუფლების მონაპოვარია ზუსტად ის, რომ კორუფციის წინააღმდეგ მაქსიმალური ბრძოლა მიმდინარეობს და არ აქვს მნიშვნელობა რა რანგის თანამდებობის პირზეა საუბარი. სწორედ ამიტომაცაა, რომ ხალხის მხრიდან ნდობა და მხარდაჭერა არის საკმაოდ მაღალი „ქართული ოცნების“ მიმართ.
რაც შეეხება ირაკლი ღარიბაშვილის ახალი ბრალის შეფასებას, შეფასებისგან თავს შევიკავებ, თუმცა ბოლო დღეებში გარკვეული სპეკულაციური წერილები, რომელიც გავრცელდა და არაფრის მომცემი არ იყო, აშკარად იკვეთება, რომ მას ჰქონდა სწორედ ასეთი მოცემულობების გადაფარვის მცდელობა და სპეკულირება.
მე მაქვს განცდა, რომ სწორედ ამ წერილებით ის ცდილობდა ახალი ბრალდებები გარკვეულწილად გადაეფარა და სპეკულირება მოეხდინა. ეს არის რაც ჩანს, თუმცა გამოძიებას უნდა დაველოდოთ. ეს არის მთლიანად სამართალდამცავი ორგანოების კომპეტენცია“, – განაცხადა გივი მიქანაძემ.
ცნობისთვის, საქართველოს ყოფილ პრემიერ-მინისტრ, პატიმრობაში მყოფ ირაკლი ღარიბაშვილს ახალი ბრალი წარუდგინეს. შესაბამისი განცხადება გენერალურ პროკურატურაში გამართულ ბრიფინგზე გაკეთდა. როგორც გენერალური პროკურორის მოადგილე ამირან გულუაშვილმა განაცხადა, საქმე ეხება კორუფციულ დანაშაულს, კერძოდ, განსაკუთრებით დიდი ოდენობით თანხის აღებას.