პოლიციამ მოკვლევა დაიწყო კადრებზე, რომლებმაც სოციალური ქსელი ააფეთქა. არაერთი მოქალაქე ამტკიცებს, რომ თბილისის ცენტრში კაცი ბავშვებს მოწყალების თხოვნას აიძულებს, ხოლო თუ ისინი მეტროს კიბეებიდან დგებიან, მათ ფიზიკურად უსწორდება. სოციალურ ქსელში ფოტო და ვიდეომასალა ვრცელდება, მომხმარებლები კი წერენ, რომ ბავშვებზე სავარაუდო ძალადობის თვითმხილველები თავადაც გახდნენ.
შემთხვევა, გავრცელებული ინფორმაციით, ხალხმრავალ ადგილზე, დელისის მეტროსთან ხდება, სადაც სათვალთვალო კამერებიც უნდა იყოს დამონტაჟებული.
“ტვ პირველი” დღეს სწორედ ამ ადგილზე მივიდა, თუმცა სავარაუდო ძალადაობაში მხილებულმა კაცმა კამერების დანახვისთანავე ტერიტორია დატოვა.
ადგილზე მომუშავე ადამიანები “ტვ პირველს” ეუბნებიან, რომ არაერთხელ შეესწრნენ, როგორ ეჩხუბებოდა კაცი პატარა ბავშვებს.
“რამდენჯერმე იყვნენ აქ, ეს კაცი სულ ეჩხუბება ხოლმე ამ ბავშვებს და რავიცი… ძალიან პატარები არიან ბავშვები, ალბათ 3-დან 5 წლამდე. ვისაც არ უნდა ჰკითხოთ, ყველა გეტყვით, რომ ქართველები არ ყოფილანო. არაერთმა მისცა საყვედური მაგაზე მაგათ, მაგრამ არაფერი” – ამბობს მოქალაქე.
“ტვ პირველი” ესაუბრა პოლიციელსაც, რომელიც აღნიშნულ ტერიტორიაზე მუშაობს. სამართალდამცველი ამბობს, რომ არაფერი გაუგია და თუკი გაიგებდა, რეაგირება აუცილებლად ექნებოდა.
“არ დამინახავს, თუ დავინახავდი, აუცილებლად მოვახდენდი რეაგირებას და მოვახდენ კიდეც” – ამბობს სამართალდამცველი.
პოლიციაში აცხადებენ, რომ ფაქტზე მოკვლევა დაწყებულია. გამოძიებამ უნდა დაადგინოს, რა ხდება სინამდვილეში, ვინ არის კადრებში ასახული კაცი და მართლაც აიძულებს თუ არა ის ბავშვებს მოწყალების თხოვნას.